«Հայաստան» Համահայկական Հիմնադրամը Հանրագիտարաններ Նուիրած է Աւելի Քան 20 Դպրոցի

0
105

«Երեւանը գրքի համաշխարհային մայրաքաղաք 2012»-ի ծիրէն ներս եւ հայոց գրատպութեան 500-ամեակին առիթով, «Հայաստան» hամահայկական հիմնադրամը պատմական եւ բնագիտական հանրագիտարաններ ու գիտադարաններ նուիրած է Հայաստանի աւելի քան 20 դպրոցի, ինչպէս նաեւ Շուշիի Աբովեանի անուան դպրոցին:

Այս ձեռնարկով Հիմնադրամը կը միանայ տարուան ընթացքին տեղ գտած եւ մինչեւ 23 Ապրիլ 2013 Հայաստանի, Արցախի եւ Սփիւռքի մէջ իրականացուելիք գրատպութեան, ընթերցանութեան եւ գրաւոր արժէքներուն նուիրուած ձեռնարկներուն:

Վերջին տարիներուն Հիմնադրամը այսպիսի նախաձեռնութեամբ հանդէս եկած է մասնաւորապէս Հայաստանի ու Արցախի այն քանի մը տասնեակ համայնքներուն մէջ, ուր համայն հայութեան ջանքերով կառուցած կամ հիմնանորոգած է կրթօճախներ` դպրոցներ, գրադարաններ, մշակութային կեդրոններ: Այս ձեռնարկը նպատակ ունի գեղեցիկ ու լուսաւոր դասասենեակներու հետ միասին պատանիներուն փոխանցել այն սէրն ու հետաքրքրութիւնը, որ հայ ժողովուրդը ունեցած է դպրութեան, մշակոյթի ու գիտութեան նկատմամբ, եւ ինքնութեան պահպանման ու գոյատեւման երկարամեայ պատմութեան ընթացքին փոխանցած է մեզ` ոսկետառ մատեաններու հետ միասին:

«Հայաստան» հիմնադրամի գործադիր տնօրէն Արա Վարդանեանի խօսքով` հայրենիքի վերաշինութեան ուղղուած աշխատանքները երկրին մէջ յառաջընթաց կ’ապահովեն միայն այն պարագային, երբ անոնք կը զուգակցուին մշակոյթի ու դպրութեան պահպանման ուղղուած համընդհանուր ջանքերուն հետ: «Մենք ցանկանում ենք գիրքը վերադարձնել մեր պատանիների սեղաններին”,- կը նշէ Արա Վարդանեան:

Մասնաւորապէս հանրագիտարաններ ու գիտադարաններ ստացած են Երեւանի Ստ. Զօրեանի անուան թիւ 56, Լեւոն Շանթի անուան թիւ 4, Եղիշէ Չարենցի անուան թիւ 67, Հայրապետ Հայրապետեանի անուան թիւ 78, Մուշեղ Գալշոյեանի անուան թիւ 148, Խրիմեան Հայրիկի անուան թիւ 10, Վահան Տէրեանի անուան թիւ 60, Չեխովի անուան թիւ 55, Խաչիկ Դաշտենցի անուան թիւ 114, Նիկոլ Աղբալեանի անուան թիւ 19, թիւ 45, թիւ 64 դպրոցները, «Օլիմպոս» կրթահամալիր-աւագ դպրոցը, խօսքի ծանր խանգարումներ ունեցող երեխաներու թիւ 8 յատուկ կրթահամալիրը, Բաղրամեանի միջնակարգ դպրոցը, Էջմիածնի Գորկիի անուան թիւ 5 դպրոցը, Գեղարքունիքի մարզի Լանջաղբիւր գիւղի Վերժինէ Ադամեանի անուան դպրոցը, Տաւուշի մարզի Դիտաւանի դպրոցը, Լոռիի մարզի Չկալով եւ Արծնի գիւղերու դպրոցները, Շուշիի Աբովեանի անուան դպրոցը:

LEAVE A REPLY

Please enter your comment!
Please enter your name here