Արշիլ Կորքիի Կտաւը Վաճառուած Է Աւելի Քան 6.8 Միլիոն Տոլարով

0
172

Երէկ երեկոյեան Sotheby’s աճուրդի տան մէջ տեղի ունեցած է ամերիկեան արուեստի աճուրդը: Հայ մեծանուն նկարիչ Արշիլ Կորքիի «Անհամբերութիւն» կտաւը վաճառուած է 6.802.500 տոլարով:

Այս մասին՝ ըստ panarmenian.net-ի՝ նշուած է աճուրդի տան կայքին մէջ: Կտաւին նախնական գինը տատանուած է 6-8 միլիոն տոլարի միջեւ: Կտաւին չափսը 62.2 x 77.5 սմ. է:

Արշիլ Կորքի` Ոստանիկ Ադոյեան, ծնած է Վանի մերձակայ Խորգոմ գիւղը 1902-1905 թուականներու միջեւ: Կորքի լքած է Վանը 1915-ին Հայոց Ցեղասպանութեան հետեւանքով եւ մօր ու 3 քոյրերուն հետ անցած է Ռուսաստանի կողմէ վերահսկուող տարածք: 1919-ին Կորքիի մայրը վախճանած է սովէն Երեւանի մէջ, իսկ Կորքի մեկնած է ԱՄՆ, հօր մօտ:

Ստեղծագործական որոնումներու մէջ ան կը փոխէ անունը՝ դառնալով Արշիլ Կորքի, այդպիսով ակնարկելով իր սիրած գրող Մաքսիմ Կորքիի: 1922-ին Կորքին ընդունուած է Պոսթընի Տիզայնի նոր դպրոցը, սկիզբը նկարած է տպաւորապաշտներու (impressionist) ազդեցութեան տակ, աւելի ուշ` ապագայապաշտներու (post- impressionist) (այդ ժամանակ ան կը բնակէր Նիւ Եորքի մէջ): Կորքիի առաջին անհատական ցուցահանդէսը տեղի ունեցած է Մելոնի պատկերասրահին մէջ 1931 թուականին:

1930-ականներուն Կորքին սերտօրէն կը համագործակցէր Սթիուըրտ Տէյվիսի, Ուիլլեմ տը Քունինիկի եւ Ճոն Կրեմի հետ: 1944-ին ան ծանօթացաւ Անտրէ Պրեթընի եւ յայտնի այլ գերիրապաշտներու (surrealist) հետ:

Առաւել յայտնի են Կորքիի` «Նկարչի եւ անոր մօր դիմանկարը» (1926-36թթ.), «Բնանկար Սեզանի ոճով» (1927), «Ինքնադիմանկար» (1937), «Կազմակերպութիւն» (1933-36), « «Composition» (1936-39) եւ այլ նկարները: Կորքի 44 տարեկանին ինքնասպան եղած է:
Կորքին կը համարուի 20-րդ դարու ամերիկեան ամենաազդեցիկ նկարիչներէն մէկը, անոր նկարները կը ցուցադրուին Ամիրիկային Միացեալ Մահանգներու բոլոր ամէնէն մեծ պատկերասրահներուն մէջ, ինչպէս նաեւ Լոնտոնի «Թէյթ» պատկերասրահին մէջ:

LEAVE A REPLY

Please enter your comment!
Please enter your name here