Օծուած Է Ջգրաշէն գիւղի Սուրբ Հրեշտակապետաց Եկեղեցին

0
139

Նինոծմինտայի շրջանի Ջգրաշէն գիւղին մէջ տեղի ունեցաւ հիմնովին վերանորոգուած Սուրբ Հրեշտակապետաց եկեղեցւոյ օծումը, որուն իրենց մասնակցութիւնը բերին Վիրահայոց թեմի առաջնորդ Վազգէն եպս. Միրզախանեանը, Սամցխէ-Ջաւախքի թեմի ընդհանուր առաջնորդական փոխանորդ Բաբգէն աբեղայ Սալբիյեանը, Նինոծմինտայի հայ համայնքներու հոգեւոր հովիւ Արմաշ քահանայ Պօղոսեանը, Ախալքալաքի Սուրբ խաչ եկեղեցւոյ հոգեւոր հովիւ Տաթեւ քահանայ Մանուկեանը, ծնունդով ջգրաշէնցի, ռուսաստանաբնակ Արսէն Քսպոյեանը՝ իր ընտանիքին հետ, հոգեւոր հայրեր եւ ժողովուրդ:
1829-1830-ական թուականներուն Կարնոյ գաւառի քանի մը գիւղերէն շրջան փոխադրուած հայ ընտանիքներուն եկեղեցին, որ 1850-ական թուականներէն վաւերագիրներուն մէջ  յիշատակուած է իբրեւ Սուրբ Հրեշտակապետաց եկեղեցի, երկար տարիներ գտնուած է կիսաքանդ վիճակին մէջ. վերջերս, ռուսաստանաբնակ ջգրաշէնցի Արսէն Քսպոյեանի բարերարութեամբ անիկա հիմնովին վերանորոգուած է: Գեղեցիկ եւ բարենորոգուած տեսք ստացած է եկեղեցին, բարեկարգուած ու ցանկապատուած են եկեղեցւոյ բակը եւ տարածքը: Եկեղեցւոյ օծումէն ետք բարերար Արսէն Քսպոյեանին յանձնուեցաւ Օրհնութեան գիր:
Այնուհետեւ նորաօծ եկեղեցւոյ մէջ մատուցուեցաւ Ս. պատարագ, որուն աւարտին կատարուեցաւ առաջին մկրտութիւնը՝ իրականութիւն դարձնելով բարերար Արսէն Քսպոյեանի վաղեմի բաղձանքը. ծննդավայրի վերականգնուած եկեղեցւոյ մէջ սրբասուրբ միւռոնով մկրտուեցան անոր ընտանիքի ութ անդամները՝ դառնալով նորաօծ եկեղեցւոյ առաջին մկրտուողները:
Անկէ ետք եկեղեցւոյ բակին մէջ ելոյթ ունեցաւ Ալիկ Քսպոյեանի ղեկավարած «Ջաւախք» երգ ու պարի համոյթը: Ապա ժողովուրդին մատաղ բաժնուեցաւ։

LEAVE A REPLY

Please enter your comment!
Please enter your name here