Օտարերկրացի Բռնապետին Արձանը Մեքսիքոյի Մէջ. The New York Times

0
112

NEWS.am-ը որոշակի կրճատումներով կը ներկայացնէ The New York Times-ի թղթակից Էլիզապէթ Մալքինի յօդուածը.

Երբ Մեքսիքոյի քաղաքապետը անցեալ տարի քաղաքի կեդրոնական այգիին մէջ բացաւ ոչ մեծ զբօսայգին, ուր մեծ արձան տեղադրուած է, կը թուէր, թէ ատիկա  մայրաքաղաքի կեանքին որակը բարձրացնելուն ուղղուած քայլ է: Սակայն Google-ով որոնումը, հնարաւոր է, քաղաքապետ Մարսել Էպրարտին ազատէր անկէ, ինչ որ տեղի պիտի ունենար յետոյ:

Քաղաքապետը գովաբանեց զայն, որուն կը պատկերէ արձանը` զայն համարելով  «քաղաքական խոշոր առաջնորդ եւ պետական գործիչ», որ Մեքսիքոյի բնակչութեան մեծ մասին համար անծանօթ է: Արձանը կը պատկերէ Հէյտար Ալիեւը, որ ղեկավարած է Ատրպէյճանը ԽՍՀՄ փլուզումէն ետք: Ան ՊԱԿ զօրավար էր, Կոմունիստական կուսակցութեան առաջնորդ:

2003-ին մահացած Ալիեւի անձով հիացումը աւելցաւ այն բանէն ետք, երբ նախագահ դարձաւ անոր որդին` Իլհամ Ալիեւը:  Վերջինիս հօր արձանները սկսան ի յայտ գալ Ռուսաստանի, Ուքրանիոյ, Թուրքիոյ, Եգիպտոսի, Վրաստանի, Ռումանիոյ եւ Սերպիոյ մէջ: Սակայն Մեքսիքոյի տարբերակը անյաջող դուրս եկաւ:

Արձանը, որ Ատրպէյճանի նուէրն է այգիին հետ միասին, քաղաքապետին դժուար կացութեան մէջ դրաւ: ԱՄՆ արտաքին գործոց նախարարութիւնը բազմիցս մատնացոյց ըրած է Ատրպէյճանի մէջ  մարդու իրաւունքներու վատ վիճակը, որ կը ներառէր նաեւ լուրջ խախտումներն ու ժողովրդավարութեան ճնշումը: Արձանը տեղադելէն քանի մը շաբաթ ետք, լրատուամիջոցները եւ իրաւապաշտպանները սկսան անոր կազմաքանդման ուղղուած արշաւին:

Սակայն արձանին կողքին տեղադրուած` 1992 թուականի  Խոջալուի զոհերու յիշատակին նուիրուած յուշատախտակը աւելի մեծ խնդիրներ յառաջացուցած է: Քաղաքային իշխանութեան մէջ ոչ մէկուն մտքով չէ անցած ստուգել յուշատախտակին վրայի գրութիւնը, որ կատարուածը կը համարէ ցեղասպանութիւն: Մեքսիքոյի ոչ մեծ, բայց  ազդեցիկ հայ համայնքը բողոք ներկայացուցած է: Նոյնը ըրած է Հայաստանի կառավարութիւնը:

Դիւանագիտական լուծում գտնելու համար քաղաքապետ Էպրարտ երեք անդամէ կազմուած յանձնաժողով ստեղծած է եւ խոստացած հետեւիլ անոր խորհուրդներուն` ոչ միայն արձանին եւ յուշատախտակին, այլ առաւել թափանցիկ որոշումներ կայացնելու վերաբերեալ: Ան կը փորձէ Ատրպէյճանի դեսպան Իլկար Մուխատրովը համոզել արձանը տեղափոխելու մասնաւոր տարածք, որ մեքսաքա-ատրպէյճանական մշակութային կեդրոն կրնայ դառնալ: Յանձնաժողովի յանձնարարականները եւ Էպրարտի առաջարկին ատրպէյճանական կողմի պատասխանը կ’ակնկալուի յառաջիկային:

LEAVE A REPLY

Please enter your comment!
Please enter your name here