«Ակօս»-ի Մէջ Կը Փորձեն Փափուկ Ոճով Իրազեկել Ցեղասպանութեան Մասին

0
155

Հայերէնով եւ թրքերէնով լոյս տեսնող «Ակօս» շաբաթաթերթը Հայոց Ցեղասպանութեան ճանաչման հասնելու համար ընտրած է ոչ թէ սպառնալու, այլ թուրք հասարակութեան մէջ Ցեղասպանութեան մասին իրազեկուածութեան մակարդակը բարձրացնելու, փափուկ ձեւով իրական պատմութիւնը պատմելու եղանակը: Այս մասին, ըստ Tert.am-ի, Պոլսոյ «Ակօս»-ի խմբագրութեան մէջ հայ լրագրողներու հետ «Հրանդ Տինք» հիմնադրամի կազմակերպած հանդիպման ընթացքին պատմած է թերթի խմբագրապետ Ռոպեր Գոբդաշ:
«2007-էն առաջ «Ցեղասպանութիւն» բառի օգտագործումը նոյնիսկ պատճառ կրնար դառնալ, որպէսզի դատախազը հետապնդէր: Ատիկա այսօր մեծ բան մը չէ: Մենք Հրանդ Տինքի օրով աւելի դժուար, եւ կամ վախնալով կ’օգտագործէինք «Ցեղասպանութիւն» բառը: Հիմա աւելի հանգիստ կը գործածենք: Մինչեւ հիմա հարց չէ եղած այս իմաստով»,- ըսած է ան` աւելցնելով, որ իրենց կեցուածքը եւ ռազմավարութիւնը «աւելի փափուկ լեզու մը հիմնելու վրայ է»:
«Ասիկա մարդոց պատմելու ձեւն է: Անշուշտ, կ’ուզենք, որ հայկական հարցը լուծուի եւ արդար կերպով լուծուի, Ցեղասպանութիւնը ճանչցուի, եւ ասոր համար է մեր աշխատանքի, մեր ուժի մեծ մասը»,- աւելցուցած է ան:
Ըստ «Ակօս»-ի խմբագրապետին` պարզ է, որ միայն իրազեկելով այդքան ալ դիւրին չէ համոզել թուրք ժողովուրդը, յատկապէս, որ թուրքերը իրենց ուսումը կը ստանան պետական դպրոցներու մէջ, կը մեծնան պետական քարոզչութեան տակ, անոնց կը սորվեցնեն, որ թուրքը յանցաւոր չէ, որ յանցաւորը հայերն են, որ Ցեղասպանութիւն չէ եղած, հայը դաւաճան եղած է եւ պատժուած է ատոր համար:
«Բայց մենք անոնց իսկական պատմութիւնը, մարդկային պատմութիւնը, մեր ընտանիքներու պատմութիւնը, իրական պատմութիւնը, մեր փորձառութիւնով, Սփիւռքի, Հայաստանի փորձառութիւնը պատմելու ջանքին մէջ ենք, եւ ասոր համար ալ չես կրնալ շատ խիստ ոճ մը գործածել, որովհետեւ, եթէ խիստ ոճ մը գործածես` անլսելի կը դառնաս, քանի որ դուն արդէն այդ հայն ես, թշնամին ես, արդէն դաւաճանն ես, ուրեմն նոյն գործունէութիւնը կը շարունակես: Քեզի լսելու պատճառ չի մնար»,- բացատրած է ան:

Ըստ անոր` սակայն եթէ գործադրես այդ փափուկ, խաղաղ ոճը, թուրք հասարակութեան ցոյց տաս, թէ ինչ տեղի ունեցած է պատմութեան ընթացքին, պատմես մարդոց իրական պատմութիւնները, բացատրես, թէ ինչ բան է հայկական սփիւռքը եւ ինչպէս յառաջացած է անիկա` թուրք հասարակութեան մէջ շատ հարցեր պիտի բարձրացնէ:

«Ասոր վրայ քիչ մը աւելի խորհուրդ տալու ոճ մը կայ, անոնց գլխուն մէջ հարցման նշաններ ստեղծելու ոճ մը կ’որոնենք: Անոր համար փափուկ է մեր լեզուն, պատժելու նպատակով չէ: Եւ միշտ այսպէս եղած է: Ասիկա, հարկաւ, կը բխի մեր փորձառութիւնեն»,- ըսած է ան:

Նշենք, որ հայ լրագրողները Պոլիս մեկնած են «Հրանդ Տինք» հիմնադրամի եւ «Հայնրիխ Պէոլլ Շթիֆթունկ» (Heinrich Beoll Stiftung) հիմնադրամի Թուրքիոյ գրասենեակին աջակցութեամբ:

 

LEAVE A REPLY

Please enter your comment!
Please enter your name here