ԷՐՏՈՂԱՆ ԿԸ ՍՊԱՌՆԱՅ ՀԱԿԱԴԱՐՁԵԼ

0
121

                    Թուրքիոյ վարչապետ Ռեճէպ Թայիփ Էրտողան թրքական բանակին իրաւասութիւն տուած է սուրիական պատերազմական օդանաւերն ու ուղղաթիռները վար առնելու, եթէ անոնք թրքական օդային տարածք մուտք գործեն: Օրաթերթը կը նշէ, որ այդ որոշումը տրուած է Թուրքիոյ հետ սահմանին մօտ գտնուող Ռասուլ Այն գիւղին դէմ սուրիական օդուժի ռմբակոծումէն ետք, ինչպէս նաեւ թրքական սահմանէն հինգ քիլոմեթր հեռաւորութեան վրայ թռիչք կատարելուն պատճառով, իրողութիւն մը, որ կը հակասէ 1971-ին երկու երկիրներուն միջեւ ստորագրուած Հալէպի արձանագրութիւններուն: Այս մասին կը յայտնէ Թրքական «Հիւրրիյէթ» օրաթերթը։

Թուրքիոյ պաշտպանութեան նախարար Իսմաթ Եըլմազ զգուշացուց, որ իր երկիրը յարմար ձեւով պիտի հակադարձէ սուրիական օդուժին կողմէ թրքական օդային տարածքի բռնաբարման` շեշտելով, որ հակադարձելու լիազօրութիւնը փոխանցուած է «շրջանին մէջ առնչակից պատասխանատուներուն»:

Ան ըսաւ, որ Թուրքիոյ վարչապետը վերոնշեալ կանոններու փոփոխութիւնը յայտարարած էր արդէն Սուրիոյ կողմէ թրքական ռմբաձիգին վար առնուելէն ետք` աւելցնելով, որ «թրքական կառավարութիւնը սուրիական օդանաւերուն իր սահմաններու բռնաբարման վերաբերեալ դիւանագիտական նոթեր ուղարկեց»:

Նշենք, որ սուրիական օդուժը երէկ 3-րդ օրն ըլլալով ռմբակոծեց Ռասուլ Այնը:

LEAVE A REPLY

Please enter your comment!
Please enter your name here