Հայկական Մեկնաբանութեամբ «Փոքրիկ Իշխանը» Անտարբեր Չէ Ձգած Եւրոպացի Հանդիսատեսը

0
125

 Երեւանի պետական տիկնիկային թատրոնի խաղացանկին մէջ ընդգրկուած «Փոքրիկ իշխանը» ներկայացումը վերադարձած է Նոյեմբեր 10-13 Պուխարեսթի մէջ իրականացուած «Արուեստներու փառատօն» մշակութային երաժշտական փառատօնէն: Այս մասին, ըստ Armenpress.am-ի, յայտնած է բեմադրիչ Լարիսա Մանկասարովան` նշելով, որ դասական ստեղագործութեան հայկական մեկնաբանութիւնը եւրոպացի հանդիսատեսը անտարբեր չէ ձգած: «Շատ լաւ անցաւ փառատօնը, այն երաժշտական օպերետային փառատօն էր, որտեղ սահմանուած չէին մրցանակային տեղեր»,- ըսած է Մանկասարովան:

 Ներկայացումը համակ ուշադրութեամբ եւ մեծ հետաքրքրութեամբ դիտած են ոչ միայն երեխաները, այլեւ անոնց ծնողները: Բեմադրութիւնը ուղեկցուած է պաստառին տեղադրուած ռումաներէն լուսագրային թարգմանութեամբ: «Թատրոնն առաջարկ ստացաւ նաեւ յաջորդ տարի մասնակցելու այս փառատօնին»,- ըսած է  բեմադրիչը: Ներկայացումը դիտելու գացած է նաեւ Ռումանիոյ մէջ Հայաստանի Հանրապետութեան արտակարգ եւ լիազօր դեսպան Համլէթ Գասպարեան: Բեմադրիչի խօսքով` թատրոնը նախապէս մասնակցած է շարք մը տիկնիկային փառատօներու, սակայն այս մէկը` իր ձեւաչափով` կը տարբերէր, քանի որ կ’ընդգրկէր ե’ւ օփերային, եւ ճազային բեմադրութիւններ, եւ միայն մանկական չէ:

«Փոքրիկ իշխանը» Մանկասարովան բեմադրած է 2005-ին: Յատուկ ներկայացման համար Արթուր Միտինեան գրած է երաժշտութիւն, որ կը հնչէ ներկայացման ողջ ընթացքին: «Արուեստներու փառատօնը» այս ներկայացման առաջին «յաջողութիւնը» չէ. 2006-ին անիկա արժանացած է «Արտաւազդ» թատերական մրցանակի, ինչպէս նաեւ նոյն թուականին մասնակցած է Իրանի մէջ տեղի ունեցած փառատօնին: Ռումանիոյ մայրաքաղաք մեկնած պատուիրակութեան կազմին մէջ եղած է 12 հոգի` ներկայացման բեմադրիչը, նկարիչը, դերասանները, ինչպէս նաեւ ճարտարագիտական անձնակազմը: «Փոքրիկ իշխանը» ներկայացուած է եւրոպացի հանդիսատեսի դատին երկու անգամ` Նոյեմբեր 11-ին եւ 12-ին:

 

 

LEAVE A REPLY

Please enter your comment!
Please enter your name here