Մեծ Խանդավառութեամբ Սկսաւ «Երգ Երգոց» Երգի Մրցանքը Լիբանանի Մէջ

0
217

Կազմակերպութեամբ Համազգայինի Լիբանանի Շրջանային վարչութեան, երէկ` 18 Նոյեմբեր 2012-ին` երեկոյեան ժամը 8:00-ին, «Յ. Տէր Մելքոնեան» թատերասրահին մէջ տեղի ունեցաւ «Երգ երգոց» երգի մրցանքը, ներկայութեամբ արուեստագէտներու, արուեստասէրներու եւ մասնակիցներուն համակիրներուն: Այս մասին կը հաղորդէ Լիբանանի “Ազդակ” օրաթերթը:

Հանդիսութեան հաղորդավարներն էին Վարդան Ազնաւուրեան եւ Փաթիլ Տէտէեան: Մրցանքի առաջին հանգրուանին, որ էսդրատային երգերու յատկացուած էր, իրենց մասնակցութիւնը բերին տասը մասնակիցներ` Ալիս Իփրաճեան, Յարութ Լափաճեան, Նշան Հաննէշեան, Գոհար Յակոբեան, Պօղոս Մալեան, Նարեկ Շանոյեան, Վարանդա Եագուպեան, Մկրտիչ Աւետանեան, Հայկանա Մուրատեան եւ Դալար Սիմոնեան: Իսկ դատական կազմին մաս կը կազմէին Ատիս Հարմանտեան, Պարգեւ Թասլաքեան եւ Շողիկ Թորոսեան:

Առաջին հանգրուանին իւրաքանչիւր մասնակից երգեց իր նախասիրած երգը, որուն մասին դատական կազմը փոխանցեց իր տեսակէտն ու նկատողութիւնները:

Հանդիսութեան հիւրաբար իրենց մասնակցութիւնը բերին «Երկու Աստղ» երգի մրցանք մասնակիցներ Իվոն Այվազեան եւ Կարօ Ակոբեան:

Յայտնենք, որ երգողներուն կը նուագակցէր Ախթամար նուագախումբը:

Աւարտին, դատական կազմի անդամները մեծապէս գնահատեցին մասնակիցներուն աշխատանքը եւ նման մրցանքի մը մասնակցելու քաջութիւնը:

Հանդիսութեան 30 առ հարիւր քուէով եւ դատական կազմի 70 առ հարիւր քուէով երկրորդ հանգրուան անցան Ալիս Իփրաճեան, Յարութ Լափաճեան, Նշան Հաննէշեան, Պօղոս Մալեան, Վարանդա Եագուպեան եւ Դալար Սիմոնեան:

Նշենք, որ երգի մրցումին երկրորդ հանգրուանը տեղի պիտի ունենայ Հինգշաբթի, 22 Նոյեմբեր 2012-ին:

 

LEAVE A REPLY

Please enter your comment!
Please enter your name here