Ըստ Լաւրովի՝ Սուրիոյ Տագնապը Կարելի Չէ Լուծել ՄԱԿ-ի Ճամբով

0
139

Ռուսիոյ արտաքին գործոց նախարար Սերկէյ Լաւրով Թեհրանի մէջ կայացած Սուրիական ազգային երկխօսութեան խորհրդաժողովին ուղղած իր խօսքին մէջ շեշտեց, թէ Սուրիոյ տագնապի լուծման համար կարելի չէ վստահիլ ՄԱԿ-ին կամ Ապահովութեան Խորհուրդին: Անոր գրաւոր խօսքը ներկաներուն ընթերցեց Թեհրանի մօտ Ռուսիոյ դեսպան Լեւոն Չաքրեանը:
Լաւրով ըսած է, թէ Սուրիա այն երկիրներէն է, որ պէտք է իրանցի իր բարեկամներուն կողքին ըլլայ, իսկ սուրիական ընդդիմութիւնը պէտք է վարչակարգին հետ երկխօսութիւն կատարէ եւ «երկիրին դէմ նիւթուած ահաբեկչական դաւերուն դէմ կանգնի»: Ան նաեւ ցաւ յայտնած է, որ Սուրիական ազատ բանակը, Ժընեւի յայտարարութիւնը մերժելով՝ կը փորձէ զինեալ պայքարի ճամբով իշխանութեան հասնիլ:
Միւս կողմէ, իսրայէլեան բանակը յայտարարեց, որ գրաւեալ Կոլանի բարձունքներուն վրայ գտնուող իր ուժերը հրետանիով կրակ բացած են սուրիական հողերուն ուղղութեամբ, երբ այդտեղէն արձակուած փամփուշտներ հարուածած են իսրայէլեան ռազմական ինքնաշարժ մը: Իսրայէլեան բանակի բանբերը շեշտեց, որ սուրիական կողմէն արձակուած փամփուշտները սխալմամբ արձակուած էին եւ ոչ թէ դիտաւորեալ:

LEAVE A REPLY

Please enter your comment!
Please enter your name here