ՄԻՆՉԵՒ ԶԻՆԱԴԱԴԱՐ, ԻՍՐԱՅԷԼ ԿԸ ՇԱՐՈՒՆԱԿԷ ՌՄԲԱԿՈԾԵԼ ԿԱԶԱՆ

0
106

Երէկ Երեքշաբթի, Իսրայէլի եւ Կազայի   բնակչութեան միջեւ  զինադադար  գոյացնելու  ճիգերը  մատնուեցան ձախողութեան:  Հակառակ Համասի    պնդումներուն եւ Եգիպտոսի նախագահ Մուհամմէտ Մորսիի հաւաստիացումներուն, օրուան վերջաւորութեան, զինադադար  հաստատելու յոյսերը աստիճանաբար  նուաղեցան: Լիքուտ կուսակցութեան  եւ իսրայէլեան կառավարութեան  անդամ մը  յայտարարեց, թէ   ներկայ պայմաններուն տակ  զինադադարի որոշում մը  ծանր հարուած պիտի  հասցնէ   Լիքուտ կուսակցութեան  ընտրական  յոյսերուն:  Քաղաքական  մեկնաբաններու կարծիքով, իսրայէլեան բանակը ցամաքային յարձակումի  նախապատրաստութիւններ կը  կատարէ    Կազայի  էմ:  Արաբական Լիկայի  ընդհանուր քարտուղար Նեպիլ Արապի, Յորդանանի  Ապտալլա  թագաւորը, Եգիպտոսի նախագահ Մուհամմէտ Մորսի զգուշացուցին Նեթանիահուն  Կազայի դէմ  ցամաքային  յարձակումի մը  հետեւանքներէն:  Իսրայէլեան կառավարութեան խօսնակ Մարք Ռեկեւ յայտարարեց, թէ «Գնդակը տակաւին խաղի մէջ է»:  Ռեկեւի  խօսքերով՝ Իսրայէլ կը պահանջէ պաղեստինցիներու կողմէ հրթիռարձակումներու  եւ մաքսանենգութիւններու դադրեցումը:

   Միացեալ  Նահանգներու պետական քարտուղար  Հիլարի Գլինթըն երէկ ուշ երեկոյեան ժամանեց Թել Աւիւ եւ  հանդիպում մը ունեցաւ վարչապետ Պենիամին Նեթանիահուի հետ:  Պետական  քարտուղարը  իր գոհունակութիւնը յայտնեց, որ   իսրայէլեան բանակը իր տրամադրութեան տակ ունի «Այրըն Տոմ» տիպի  պաշտպանութեան հռթիրներ: Գլինթըն այսօր հանդիպումներ պիտի ունենայ   Պաղեստինեան Իշխանութեան  նախագահ  Մահմուտ Ապպասի, ինչպէս նաեւ Եգիպտոսի նախագահ Մուհամմէտ Մորսիի հետ:   Գլինթըն վերահաստատեց Իսրայէլի անվտանգութեան հանդէպ  Միացեալ Նահանգներու անվերանայելի  յանձնառութիւնը:  

Նիւ Եորքի մէջ,  ՄԱԿ-ի Ապահովութեան Խորհուրդը ապարդիւն նիստ մը եւս գումարեց, երբ  Միացել Նահանգներու դեսպան  Սուզան  Ռայս անգամ մը եւս մերժեց Կազայի  վերաբերեալ Ռուսիոյ   նախագիծը:  Ապահովութեան Խորհուրդը որոշեց  շարունակել Կազայի  հակամարտութեան շուրջ իր քննարկումները, մինչեւ զինադադարի  գոյացումը: ՄԱԿ-ի մօտ Պաղեստինեան Իշխանութեան ներկայացուցիչը  յայտնեց, թէ  Կազայի  դէմ յարձակումները ցարդ խլած են  140 քաղաքացիներու կեանք: Վիրաւորներուն թիւը անցած է հազարը:

 Ուաշինկթընի մէջ, պետական  քարտուղարութեան խօսնակ Վիքթորիա Նուլանտ  քննադատեց  Իսրայէլի հանդէպ Թուրքիոյ կեցուածքը: Նուլանտ  ըսաւ, թէ հռետորաբանութիւնը չի նպաստեր  լարուածութեան թուլացման:

  Հակառակ   զինադադար  հաստատելու  միջազգային   ճիգերուն, իսրայէլեան բանակը  կը  շարունակէ   օդային, ծովային եւ ցամաքային  ռմբակոծումի ենթարկել  Կազան:  Իսրայէլի ուղղութեամբ  մօտաւորապէս 162  հրթիռներ արձակուեցան Կազայէն:

LEAVE A REPLY

Please enter your comment!
Please enter your name here