Անկախութեան Օրուան Առիթով Արտասանած Իր Խօսքին Մէջ, Նախագահ Սըլէյման Կը Շեշտէ Յանձնառու Մնալ «Պաապտայի Յայտարարութեան » եւ Վերադառնալ Երկխօսութեան

0
156

Հանրապետութեան նախագահ զօր. Միշել Սըլէյման երէկ երեկոյեան ժամը 8:00-ին նախագահական պալատին մէջ ընդունեց դատական խորհուրդներու եւ մարդկային իրաւունքներու պաշտպանութեան կազմակերպութիւններու ներկայացուցիչներ, որոնց ներկայութեան  լիբանանցիներուն փոխանցեց Լիբանանի անկախութեան 69-ամեակին առիթով իր պատգամը:

Նախագահ Սըլէյման նշեց, որ անկախութեան տօնը առիթ մըն է կերտելու լիբանանեան հայրենիքը, զայն պաշտպանելու հաւանական դաւադրութիւններէ եւ զոհողութիւններ կատարելու` երկիրը պահպանելու համար ազատ, անկախ եւ գերիշխան:

«Երկրին անկախութիւնը չ՛ամրապնդուիր, եթէ Լիբանան իր առաջնահերթութիւնները չճշդէ եւ անոնց յանձնառու չմնայ: Այդ յանձնառութիւններուն շրջագիծին մէջ կ՛իյնայ Լիբանանը ներքին սադրանքներէ հեռու պահելը եւ զայն շրջանային տագնապներէ ու բախումներէ հեռացնելը, երկրին պաշտպանութեան ռազմավարութեան շուրջ համախոհութիւն գոյացնելը, երկրին ճակատագրական հարցերուն լուծումը պետութեան վստահիլը, ինչպէս նաեւ Իսրայէլին ստիպելը, որ ան գործադրէ ՄԱԿ-ի Ապահովութեան Խորհուրդի թիւ 1701 բանաձեւը», ըսաւ նախագահ Սըլէյման:

Սըլէյման շեշտեց, թէ անցնող չորս տարիներուն ընթացքին, լիբանանեան պետութիւնը ճիգ չէ խնայած ամրապնդելու երկրին ապահովական կայունութիւնը եւ յաջողած է իր առաքելութեան մէջ: «Իսկ երբ վրայ հասաւ Սուրիոյ տագնապը, ապա փութացինք որդեգրելու չէզոք կեցուածքի քաղաքականութիւնը եւ բանակն ու ապահովութեան ուժերը մղեցինք խստացնելու երկրին մէջ որդեգրուած ապահովական միջոցառումները: «Մենք այսօր պէտք է շատ աւելի մեծ ըլլանք այս խաղերէն, եթէ կ՛ուզենք պաշտպանել մեր անկախութիւնը: Պէտք է անշեղ մնալ եւ կատարեալ յանձնառութեամբ գործադրել «Պաապտայի յայտարարութեան» կէտերը` Լիբանանը շրջանային տագնապներէ եւ բախումներէ չէզոք պահելու համար, կառչած մնալ պաղեստինցի գաղթականներուն տունդարձի իրաւունքին, վերադառնալ երկխօսութեան տրամաբանութեան` լուծելու համար Լիբանանի ներքին քաղաքական հարցերն ու տարակարծութիւնները», ըսաւ ան:

Նախագահ Սըլէյման կոչ ուղղեց նաեւ երեսփոխանական ընտրութիւնները կատարելու սահմանադրութեամբ ճշդուած թուականին` առանց մտածելու ընտրութիւնները յետաձգելու հաւանականութեան մասին:

Ան շեշտեց, որ պէտք չէ դատական իշխանութեանց գործունէութեան միջամուխ դառնալ, ընդհակառակն` պէտք է օրէնքը պարտադրել:

Նախագահ Սըլէյման անկախութեան իր պատգամը եզրափակեց ապահովական ուժերէն պահանջելով, որ ոչ մէկ ապօրինութեան, օրինազանցութեան կամ յանցանքի պարագային թուլութիւն ցուցաբերեն, մանաւանդ եթէ այդ օրինազանցութիւնը ուղղակիօրէն կապուած է պետական անվտանգութեան դէմ սպառնալիքի կամ ներքին լիբանանեան առումով զէնքի ապօրինի օգտագործումին:

 

LEAVE A REPLY

Please enter your comment!
Please enter your name here