Անկախութիւնը Միայն Բանակին Չի Պատկանիր, Այլ` Բոլոր Լիբանանցիներուն

0
163

Լիբանանեան բանակի հրամանատարութիւնը Նոյեմբեր 21-ին հրապարակեց հաղորդագրութիւն մը, որուն մէջ ցաւ յայտնեց բանակին դէմ կատարուած տեղեկատուական ցեխարձակումներուն առնչութեամբ` նկատի ունենալով բանակին փորձերուն պատճառած երթեւեկի խճողումի հարցը:

Լիբանանի անկախութեան 69-ամեակին առիթով բանակին հրամանատարութիւնը շնորհաւորեց լիբանանցիները եւ շեշտեց, որ անկախութիւնը միայն բանակին չի պատկանիր, այլ` բոլոր լիբանանցիներուն անխտիր:

Հաղորդագրութեան մէջ նշուեցաւ նաեւ, որ բանակին տողանցքը Լիբանանի անկախութեան եւ գերիշխանութեան խորհրդանիշն է, որ բանակին համար հպարտութիւն է, ինչպէս նաեւ այդ անկախութիւնը պաշտպանելու իմաստով առաջնահերթութիւն:

Պաշտպանութեան նախարար Ֆայեզ Ղոսըն Լիբանանի անկախութեան տօնին առիթով շնորհաւորեց լիբանանցիները եւ կոչ ուղղեց անոնց ներքին տարակարծութիւնները լուծելու նպատակով ազգային երկխօսութիւնը նկատի ունենալու իբրեւ միակ միջոց:

Իր կարգին, հանրապետութեան միւֆթի շէյխ Մուհամմէտ Ռաշիտ Քապպանի Լիբանանի իշխանութեան պետերը, բանակի հրամանատարն ու լիբանանցիները շնորհաւորեց երկրին անկախութեան տօնին առիթով` բարձր գնահատելով Լիբանանի անկախութեան պահպանման ի խնդիր արձանագրուող զոհողութիւնները:

Շիիներու գերագոյն խորհուրդի փոխնախագահ շէյխ Ապտէլ  Ամիր Քապալան անկախութեան տօնին առիթով շնորհաւորեց լիբանանցիները` շեշտելով, որ լիբանանեան ազգային միասնականութիւնը Լիբանանի գերիշխանութիւնը պաշտպանելու լաւագոյն զէնքն է:

Հըզպալլայի կողմէ հրապարակուած հաղորդագրութիւն մը իր կարգին կոչ ուղղեց լիբանանցիներուն յանձնառու մնալու «Ժողովուրդ, բանակ, Դիմադրութիւն» տարազին եւ զգուշանալու Լիբանանը թիրախ դարձնող վտանգներէն:

Միւս կողմէ, նշենք, որ հանրապետութեան նախագահ զօր. Միշէլ Սըլէյմանի, խորհրդարանի նախագահ Նեպիհ Պըրրիի եւ վարչապետ Նեժիպ Միքաթիի ներկայացուցիչները, Լիբանանի անկախութեան տօնին առիթով ծաղկեպսակներ զետեղեցին 69 տարի առաջ այդ անկախութիւնը կերտած անձնաւորութիւններուն դամբարաններուն:

LEAVE A REPLY

Please enter your comment!
Please enter your name here