Գերմանահայերը Կը Պայքարին Հալլէի Մէջ Կանգելիք Խաչքարի Վրայ «Ցեղասպանութիւն» Բառը Զետեղելու Համար

0
172

Գերմանական Հալլէ քաղաքի հայ համայնքը ստորագրահաւաք նախաձեռնած է քաղաքապետարանի մշակոյթի յանձնաժողովի որոշման դէմ: Այս մասին կը հաղորդէ Armenpress.am-ը` վկայակոչելով Գերմանիոյ` Հայոց Ցեղասպանութեան ճանաչման յանձնախումբը:

Հալլէի քաղաքապետ տիկին Տակմար Շապատոս նախապէս իր համաձայնութիւնը տուած է հայ համայնքի խնդրանքին` քաղաքին մէջ 1915 թուականի Ցեղասպանութեան զոհերու յիշատակին խաչքար կանգնեցնելուն վերաբերեալ: 2015-ին կանգեցուելիք խաչքարի ձեւանմուշին վրայ ի սկզբանէ գրուած եղած է «Ցեղասպանութիւն» բառը: Անիկա, սակայն, Հալլէի քաղաքապետարանի մշակոյթի յանձնաժողովը առաջարկած է փոխարինել «կոտորած եւ տեղահանութիւն» բառերով` մատնացոյց ընելով Գերմանիոյ խորհրդարանի` պունտեսթագի` այդ հարցին վերաբերեալ 2005-ին ընդունուած բանաձեւը:

Հալլէի հայերը, սակայն, կը պնդեն, որ խաչքարին վրայ «Ցեղասպանութիւն» բառին առկայութիւնը ոչ մէկ իրաւական պարտաւորութիւն կ’ենթադրէ ո’չ քաղաքի ղեկավարութեան, ո’չ ալ առաւել եւս մշակութային յանձնաժողովին համար:

Գերմանահայերու նախաձեռնած ստորագրահաւաքին կրնայ մասնակցիլ հարցով շահագրգիռ ամէն անհատ` միանալով Հալլէ քաղաքի քաղաքապետին եւ շարք մը այլ պատասխանատուներու ուղղուած նամակներուն` http://www.aga-online.org/alert/detail.php?locale=de&alertId=5 ելեկտրոնային հասցէին պարզապէս լրացնելով իրենց անունն ու ելեկտրոնային հասցէն:

Գերմանահայերու նման նախաձեռնութիւնները արդէն քանի մը անգամ տուած են իրենց ցանկալի արդիւնքը, մասնաւորապէս, այն ժամանակ, երբ անոնք կտրականապէս դէմ հանդէս եկան գերմանական Մանհայմ քաղաքի մէկ հատուածը պաշտօնապէս «թրքական զանգուած» վերանուանելու հնարաւոր որոշման դէմ:

LEAVE A REPLY

Please enter your comment!
Please enter your name here