Հոլանտ Առաջնայնութիւնը Կու տայ Լիբանանի Կայունութեան

0
115

Վարչապետ Նեժիպ Միքաթի եզրափակեց Ֆրանսա կատարած իր այցելութիւնը` հանդիպում մը ունենալով Ֆրանսայի նախագահ Ֆրանսուա Հոլանտի հետ:

Հանդիպման ընթացքին Հոլանտ շեշտեց, որ Ֆրանսա  միջամուխ պիտի  չդառնայ ներլիբանանեան հարցերուն, ինչպէս նաեւ լիբանանցիներուն դասեր պիտի չսորվեցնէ, «սակայն Փարիզ կը մաղթէ, որ լիբանանեան քաղաքական բոլոր կողմերը իրենք զիրենք պատասխանատու զգան ներկայ հարցերուն լուծումներ գտնելու», ըսաւ ան:

Հոլանտ կոչ ուղղեց լիբանանցիներուն ըլլալու զգաստ եւ շեշտելու իրենց ազգային միասնականութեան, գործակցութեան եւ կայունութեան անհրաժեշտութիւնը, որպէսզի կարելի ըլլայ շրջանցել Լիբանանը շրջապատող բոլոր տագնապները:

Հոլանտ ողջունեց Լիբանանի կառավարութեան կեցուածքը` Լիբանանի յատուկ Միջազգային դատական ատեանին գործունէութիւնը շարունակելու առումով:

Ֆրանսայի նախագահը շեշտեց, որ ինք կը յարգէ նաեւ Լիբանանի կառավարութեան որդեգրած չէզոք կեցուածքը` Սուրիոյ տագնապին առնչութեամբ:

«Ֆրանսա մնայուն կերպով պիտի զօրակցի Լիբանանին, յատկապէս Լիբանան ժամանած սուրիացի գաղթականներուն մեծ բեռը բաժնեկցելու առումով», ըսաւ ան:

Հոլանտ հաստատեց, որ Ֆրանսա նեցուկ կը կանգնի Լիբանանի ազգային միասնականութեան, ապահովական կայունութեան եւ գերիշխանութեան պահպանումին: Ան աւելցուց, որ Ֆրանսա կը միտի նաեւ օժանդակել լիբանանեան բանակի զինման` մեկնելով այն համոզումէն, թէ բանակը զինուորական միակ հաստատութիւնն է, որ կրնայ երաշխաւորել Լիբանանի ապահովական կայունութիւնը:

Աւելի ուշ լիբանանեան պատուիրակութիւնն ու անոր մաս կազմող նախարարներուն ֆրանսացի պաշտօնակիցները միացան նախագահ Հոլլանտի եւ վարչապետ Միքաթիի` աշխատանքային աւելի ընդարձակ հանդիպումի մը նպատակով:

Հանդիպումէն ետք վարչապետ Միքաթի յայտնեց, որ ինք շնորհակալութիւն յայտնած է նախագահ Հոլանտին` Լիբանանի նկատմամբ Ֆրանսայի ցուցաբերած մնայուն զօրակցութեան, Լիբանան կատարած անոր այցելութեան եւ հանրապետութեան նախագահ զօր. Միշել Սըլէյմանի երկխօսութեան ճիգերուն նկատմամբ անոր քաջալերանքին համար:

«Հոլանտի մօտ շատ յստակ կ՛երեւի Լիբանանի կողմէ Սուրիոյ տագնապին գծով որդեգրուած քաղաքականութեան նկատմամբ դրական համոզումը», ըսաւ Միքաթի` աւելցնելով, որ Հոլանտի հետ քննարկած է նաեւ պաղեստինեան իրադարձութիւնները, լիբանանեան տնտեսութեան նկատմամբ ֆրանսական զօրակցութիւնը, հարաւային Լիբանանի մէջ տեղակայուած ՖԻՆԻՒԼ-ի միջազգային խաղաղապահ ուժերուն թղթածրարը, ինչպէս նաեւ լիբանանեան բանակը զինելու Ֆրանսայի պատրաստակամութիւնը:

 

 

LEAVE A REPLY

Please enter your comment!
Please enter your name here