Հայոց Ցեղասպանութեան Մասին Պատմող «Վանայ Ծովուն Արշալոյսը» Շարժանկարը Կը Ցուցադրուի ԱՊՀ Երկիրներուն Մէջ

0
174

Հայոց Ցեղասպանութեան մասին պատմող «Վանայ ծովուն արշալոյսը» շարժանկարը ցուցադրուած է Մինսկի, Քիեւի, Տոնի Ռոստովի ու Գրասնոտարի մէջ: Շարժանկարը արժանացած է հայերու ամենաջերմ ընդունելութեան: Սփիւռքի մէջ հայապահպանութեան խնդիրներու հարցադրումներ ընող շարժանկարը նախաձեռնողներու սպասածին պէս խիստ յուզական ազդեցութիւն ունեցած է  հանդիսատեսի վրայ: «Արտերկրի մէջ ապրող մեր հայենակիցներու փափաքին ընդառաջ ու գիտակցելով, որ «Վանայ ծովուն արշալոյսը» շարժանկարը եւս մէկ քայլ է ազգային ինքնագիտակցութեան պահպանման առումով` նախաձեռնեցինք կազմակերպել այս ծրագիրը»,- ըստ Armenpress.am-ի` ըսած է ցուցադրումներու նախաձեռնող` Սփիւռքահայ ուսանողներու խորհուրդի նախագահ Սամուէլ Մկոյեան:

Ստեղծագործական խումբը` սենարիստ Արմէն Վաթեանն ու բեմադրիչ Վահան Ստեփանեանը, ծրագրի ծիրէն ներս հանդիպումներ ունեցած են տեղի հայկական համայնքներու ներկայացուցիչներու, հայկական կազմակերպութիւններու հետ: Հայաստանէն մեկնած պատուիրակութիւնը ամէն տեղ արժանացած է ջերմ ընդունելութեան: Քննարկուած են յատկապէս հայ համայնքներու հետ համագործակցութեան ծրագրեր, ճշտուած յետագայ ընելիքները:
Շարժանկարի իրադարձութիւնները կը կրեն 1915-ի ցեղասպանութեան հետեւանքները, կը ծաւալի Կարապետ Փամպուքճեանի ընտանիքին մէջ, որ կը ներկայացնէ  Ամերիկա ներգաղթած հայերու չորորդ սերունդը եւ կանգնած է  «Ամերիկա» կոչուող բազմազգ խառնարանին մէջ ընդհանուրին միաձուլուելու վտանգի եզրին. Մէկ կողմէն որդին, որ կ’ըմբոստանար հօր ձեռնարկած արմատները պահպանելու փորձերուն դէմ, միւս կողմէն թոռը, որ սիրահարուած էր թրքուհիի մը: 80-ամեայ Կարապետը, որուն մայրը հրաշքով փրկուած էր եղեռնէն, կը ձգտէր ամէն կերպ իր օտարուած որդիի եւ թոռնիկի մէջ արթնցնել, ամրացնել կորուսեալ hայրենիքի հետ կապը, փրկել ընտանիքը օտարացումէ ու բաժանումէ: Կարապետ Փամպուքճեանի յոյսը այս հարցով իւրաքանչիւր հայու արեան մէջ առկայ ծինային յիշողութիւնն է, որ հնարաւոր չէ սպաննել կամ ջնջել` անկախ անկէ, թէ ուր կ’ապրի հայը…

Նկարահանումները կատարուած են Հայաստանի, ԱՄՆ-ի, Ֆրանսայի եւ Արեւմտեան Հայաստանի մէջ: Գլխաւոր դերերուն մէջ նկարահանուած են տարբեր երկիրներէ հրաւիրուած դերասաններ` Ժան-Փիեռ Նշանեան (ԱՄՆ), Արէն Վաթեան (ՌԴ), Արեւիկ Մարտիրոսեան (Ֆրանսա) եւ Կարէն Ճհանգիրեան, որ կը կերտէ Կարապետ Փամպուքճեանի կերպարը: Առաջին անգամ հայկական շարժանկարի մէջ նկարահանուած է նաեւ թուրք դերասան. Կիւնըշը Զանը մարմնաւորած է Կարապետի թոռան ընկերուհին, որ շարժանկարին մէջ եւս թրքուհի է:

LEAVE A REPLY

Please enter your comment!
Please enter your name here