Կիլիկեան Վարժարանի Բացումը Երեւանի Մէջ Լուծեց Սուրիահայ Երեխաներու Կրթութեան Հարցը

0
124

Աւելի քան մէկ ամիս է, որ Երեւանի մէջ կը գործէ Կիլիկեան վարժարանը: Այս մասին կը հաղորդէ Armnewstv.am-ը: Այնտեղ այժմ կ’ուսանի 250 սուրիահայ աշակերտ, բայց անոնց թիւը անընդհատ կը փոխուի: Ոմանք կը վերադառնան Սուրիա, ոմանք նոր կու գան Հայաստան: Բայց բոլոր աշակերտներն ալ տեղ ունին այս վարժարանին մէջ: Ասիկա Հայաստանի մէջ միակն է, ուր ուսուցումը կ’իրականացուի սուրիական ծրագրով:

Երբ հայաստանեան դպրոցներուն մէջ աշնանային արձակուրդ էր, Կիլիկեան վարժարանը կ’աշխատէր: Պէտք էր լրացնել անցած դասերը, քանի որ դասերը մէկ ամիս ուշ սկսած էին: Այժմ ամէն ինչ կարգին է: Տնօրէնը գոհ է: Առաջին գրաւորները յանձնած են, արդիւնքները ոգեւորիչ են:

Ուսուցիչներու պակաս վարժարանը չունի: Բոլորը Սուրիայէն են: Յասմիկ Հեճինեան արաբերէն կը դասաւանդէ առաջիններուն: Չորս ամիս առաջ Հալէպէն տեղափոխուած է Երեւան: Սուրիոյ մէջ եւս կ’աշխատէր Կիլիկեան վարժարանի մէջ: Հայաստան եկած է ընտանիքով: Վերադառնալու մասին չեն մտածեր: Դուստրերը կը յաճախեն հայաստանեան դպրոց: Իսկ Կիլիկեան վարժարան կը յաճախեն յատկապէս անոնք, որոնք մտադիր են վերադառնալ: Կ’ուսանին սուրիական ծրագրով, որպէսզի իրենց սուրիացի ընկերներէն ետ չմնան: Վարժարանին մէջ կը մտածեն նաեւ արեւելահայերէնի դասեր կազմակերպելու մասին: Հաւանաբար պիտի դասաւանդեն Նար-Դոսի դպրոցի ուսուցիչները, ուր կը գտնուի նաեւ Կիլիկեան վարժարանը: Թէկուզ ժամանակաւոր, բայց Հայաստանի մէջ ապրող սուրիահայ երեխաներուն արեւելահայերէն սորվիլը անհրաժեշտ է:

Վարժարանի ամենամեծ դասարանը 8-րդն է` 43 աշակերտով: Իբրեւ կանոն դասարաններուն մէջ աշակերտները 30-35-ը չեն գերազանցեր, բայց այստեղ Երեւանի մէջ այլ տարբերակ չկայ, պէտք է ընդունիլ բոլոր փափաքողները: Սուրիայէն Հայաստան անցումը դիւրին չէր: Այնտեղ ձգած են իրենց տունն ու ընկերները, ի վերջոյ, հարազատ միջավայրը: Կը կարօտնան ամէն ինչ` խոհանոցէն մինչեւ բակը:

Վարժարանին մէջ կը ստեղծեն բոլոր յարմարութիւնները, որ աշակերտները տարբերութիւն չզգան: Շուտով պիտի լուծուի նաեւ վկայականի հարցը: Վերջին այցելութեան ժամանակ Սփիւռքի նախարար Հրանոյշ Յակոբեան խոստացած է  անպայման զբաղիլ այդ հարցով:

LEAVE A REPLY

Please enter your comment!
Please enter your name here