Ռազմական Գործողութիւնները Չեն Կրնար Լուծել Ղարաբաղի Խնդիրը. Փաթրիք Մըրֆի

0
104

Ռազմական գործողութիւնները չեն կրնար լուծել Ղարաբաղի խնդիրը: Այս մասին` ըստ News.am-ի` յայտարարած է ԵԱՀԿ նախագահի Հարաւային Կովկասի հարցով յատուկ ներկայացուցիչ, դեսպան Փաթրիք Մըրֆի` “Ռեկիոն” կեդրոնին մէջ կայացած ասուլիսի ընթացքին: Անոր խօսքով, իրավիճակը տարածաշրջանին մէջ շատ լուրջ է: Վերջին ժամանակներս լարուածութիւնը աճած է եւ Ռամիլ Սաֆարովի հետ առնչուած պատմութիւնը, ինչպէս նաեւ Լեռնային Ղարաբաղի մէջ օդակայանի բացման հարցը նպաստած են անվստահութեան մթնոլորտի յետագայ խորացման:

“Հետզհետէ աւելի յաճախ կ’օգտագործուի ռազմական հռետորութիւնը եւ կարեւոր է հնարաւոր ամէն ինչ ընել, որպէսզի անիկա չվերաճի բռնի գործողութիւններու, որուն կրնան հետեւիլ պատասխան գործողութիւններ: Ես վստահ եմ, որ ռազմական գործողութիւնները չեն կրնար լուծել հակամարտութիւնը:

Ես ասիկա կ’ըսեմ իբրեւ ԵԱՀԿ-ի իռլանտական նախագահութեան յատուկ ներկայացուցիչ: Իռլանտան երկար տարիներ եղած է արիւնալի հակամարտութեան վկան: Ռազմական գործողութիւնները անկանխատեսելի հետեւանքներ կրնան ունենալ եւ ալ աւելի կը խորացնեն հակամարտութիւնը, կը բազմապատկեն դժուարութիւնները, որոնց կը բախի տարածաշրջանի բնակչութիւնը”,- ընդգծած է Մըրֆի:

Յատուկ ներկայացուցիչը յիշեցուցած է, որ Հելսինկեան ամփոփիչ ակտը, որ ստորագրած են նաեւ Հայաստանն ու Ատրպէյճանը, արդէն կը պարունակէ կարեւոր դրոյթներ, որոնք կը վերաբերին ուժի կամ ուժի սպառնալիքի չկիրառման: Կայ նաեւ կողմերու միջեւ 1994-ին ստորագրուած հրադադարի մասին համաձայնագիրը: Այդ պարտաւորութիւններուն խստիւ կատարումը արդէն զգալի ներդրում պիտի ըլլար շրջաններուն մէջ անվտանգութեան վերականգնման առումով:

“Իւրաքանչիւր նախաձեռնութիւն, որ ուղղուած է ուժի չկիրառման սկզբունքի յետագայ հաստատման, անկասկած, ողջունելի պիտի ըլլայ: Ես նախկինի նման վստահ եմ, որ գործընթացին մէջ մեծ թերութիւնը շրջաններուն միջադէպերու հետ կապուած աշխատանքի մեքենականութեան բացակայութիւնն է: Ես կը խօսիմ ոչ միայն հետաքննութեան մեքենականութեան, այլեւ այնպիսի մեքենականութեան մասին, որուն շնորհիւ տեղի հրամանատարները պարբերաբար պիտի հաւաքուին եւ քննարկեն կողմերը անհանգստացնող հարցերը, ինչպէս կրակոցները, զօրքերու տեղաշարժը, անօդաչու թռչող սարքերու թռիչքները եւ այլ գործօններ, որոնք կը նպաստեն զոնուորներու համար վտանգաւոր իրավիճակներու ստեղծման”,- նշած է Մըրֆի:

LEAVE A REPLY

Please enter your comment!
Please enter your name here