Երիտասարդ Հայ Գիտնականները Կ’առաջարկեն Անասուններու Արհեստական Բեղմնաւորման Գերարդիւնաւէտ Եղանակ

0
159

Հայ երիտասարդ գիտնականներու խումբը մշակած է անասուններու արհեստական բեղմնաւորման կենսա-ճարտարագիտական եղանակ: Այս մասին կը հաղորդէ News.am-ը:

Եղանակի էութիւնը հետեւեալն է. ոչ մեծ չափերով սարքը կ’աշխոյժացնէ անասունի նօսրացուած սերմնահեղուկը ինքնաշխատ շարժիչի միջոցով: Յայտնագործութիւնը ներկայացուած է այս օրերուն Երեւանի մէջ ընթացող Վենչուրային խորհրդաժողովին, ուր լաւագոյն գաղափարներու համար նախատեսուած է 15.000 տոլար դրամաշնորհ:

Յայտնագործութիւնը ներկայացնող Նայիրա Պաղտասարեան նշած է, որ գիւտը մշակուած է Երեւանի բժշկակենսաբանական կեդրոնին մէջ: Սարքի առաւելութիւնը այն է, որ կարելի է օգտագործել ոչ միայն շէնքային պայմաններու մէջ, այլեւ որեւէ տեղ` ըլլայ լեռ, արօտ եւ այլն: Ասիկա նպատակայարմար է այն առումով, որ խոշոր եղջերաւոր անասուններու աշխոյժ բեղմնաւորման շրջանը Մայիս-Յունիսին է, երբ անասունները կ’ուղարկեն արօտներ:

Ն. Պաղտասարեան նշած է, որ սարքը փորձարկած են խոզերու վրայ եւ ստացած մօտ 98% արդիւնաւէտութիւն, զգալիօրէն աւելի բարձր, քան ժամանակակից միւս եղանակներու կիրառման պարագային (ելեկտրամագնիսական ճառագայթում, էմպրիոններու հեղուկներ): Սակայն սարքը կիրառելի է բոլոր անասուններուն համար: Բացի այդ` ինքնաշխատ շարժիչի առաջարկուող եղանակը աւելի դիւրին է կիրառել, անիկա յատուկ մասնագէտ չի պահանջեր` բաւարար է անասնաբոյժը:
Սարքին արժէքը, ըստ Ն. Պաղտասարեանի, պիտի ըլլայ 400 տոլար: Հայաստանի մէջ նման սարքի նկատմամբ կրնան պահանջարկ ձեւաւորել խոշոր եւ միջին ագարակները, որ մօտ 3000 սարքի պահանջարկ կը ստեղծէ:

LEAVE A REPLY

Please enter your comment!
Please enter your name here