Թուրքիոյ Մէջ «Փեթրիոթ»ները ՆԱԹՕ-ի Հրամանատարութեան Ներքեւ Պիտի Ըլլան

0
146

ՆԱԹՕ-ի հրամանատարութիւնը յայտարարեց, թէ Թուրքիա տեղադրուելիք «Փեթրիոթ» տիպի հրթիռները պիտի ըլլան ՆԱԹՕ-ի հրամանատարութեան հակակշիռին տակ, իսկ անոնց տեղադրման ծախսերը պիտի հոգայ հիւրընկալ երկիրը:
ՆԱԹՕ-ի հրամանատարութիւնը նաեւ պատրաստակամութիւն յայտնեց յաւելեալ միջոցառումներ որդեգրելու, եթէ Թուրքիոյ ապահովութիւնը վտանգուի՝ յիշեցնելով, որ Թուրքիա ՆԱԹՕ-ի անդամ է:
Իր կարգին, Թուրքիոյ վարչապետ Ռեճէպ Թայիփ Էրտողան կրկնեց, որ Թուրքիա իր ապահովութիւնը երաշխաւորելու համար անհրաժեշտ միջոցառումներ պիտի որդեգրէ՝ պնդելով, թէ Թուրքիոյ մէջ «Փեթրիոթ» համակարգերու տեղակայման մասին պէտք չէ այլ մեկնաբանութիւններ կատարել: Ան ըսաւ, որ Թուրքիա ստիպուած է իր հողերուն վրայ նման հրթիռներ տեղակայելու, դէմ դնելու համար «նախապէս թրքական հողերուն վրայ հրթիռներ արձակած եւ Թուրքիոյ դէմ լայնածաւալ յարձակումներ գործած Սուրիոյ կողմէ յարձակումի մը հաւանականութեան»:
Էրտողան յայտնեց, որ երբ հարցը երկիրի ապահովութեան սպառնալիքի կը վերաբերի, ապա Անգարա պիտի չտատամսի անհրաժեշտ միջոցառումներ որդեգրելու:
Թուրքիոյ արտաքին գործոց նախարար Ահմէտ Տաւուտօղլու իր կարգին յայտնեց, որ «երբ վտանգը մեր սահմանէն վերանայ», հրթիռները պիտի վերադարձուին այն երկիրներուն, ուրկէ բերուած են:
Իր կարգին, Ռուսիոյ վարչապետ Տմիթրի Մետվետեւ յայտնեց, որ իր երկիրը արտաքին յարձակումէ պաշտպանուելու զէնքեր կը տրամադրէ Սուրիոյ՝ ընդգծելով, որ Ռուսիոյ եւ Սուրիոյ միջեւ զինուորական գործակցութիւնը միշտ թափանցիկ եղած է: Ռուսիոյ վարչապետը յայտնեց, որ Ֆրանսայի կողմէ սուրիական ընդդիմադիր Ազգային համաձայնական խորհուրդի ճանաչումը «անընդունելի է»՝ նշելով, որ սուրիացի ժողովուրդը ի՛նք պէտք է վարչակարգին ճակատագիրը ճշդէ, իսկ ընդդիմութիւնը կրնայ իշխանութեան հասնիլ միայն օրինական ճամբով եւ ոչ թէ այլ երկիրներ իրեն զէնք ու զինամթերք մատակարարելով:
Մետվետեւ քննադատեց Սուրիոյ մէջ թէ՛ իշխանութեան եւ թէ ընդդիմութեան կողմէ գործուած արարքները, որոնք երկիրը դէպի քաղաքացիական պատերազմ կ՛առաջնորդեն: Ան զգուշացուց, որ Սուրիոյ մասնատումը կրնայ Միջին Արեւելքի մէջ ստեղծել լարուածութեան նոր վայր մը, որմէ կրնան օգտուիլ ծայրայեղական տարրերը՝ նշելով, որ այդ մէկը «Սուրիոյ, Ռուսիոյ կամ որեւէ այլ երկիրի շահերէն չի բխիր»:
Յայտնենք, թէ սուրիական ընդդիմադիր Ազգային համաձայնական մարմինը Երեքշաբթի օր Բրիտանիոյ մօտ «դեսպան» նշանակած է Իսլամ եղբայրներու անդամ մը:
Ապահովական գետնի վրայ սուրիական օդուժը ռմբակոծած է Թուրքիոյ սահմանին մօտերը գտնուող ընդդիմադիրներու դիրքերը: Բախումներ տեղի ունեցած են նաեւ Դամասկոսի արուարձաններուն մէջ, իսկ Դամասկոսի մէջ ահաբեկչական երկու արարքներու հետեւանքով՝ քաղաքացի մը սպաննուած է:

LEAVE A REPLY

Please enter your comment!
Please enter your name here