Թուրքիոյ Նախագահական Պալատը Հայ Ընտանիքէ Խլուած Տուն Է. Միլլիէթ

0
134

Թուրքիոյ նախագահական Չանքայա պալատի ներսը գտնուող թանգարան-պալատը կը պատկանի Քասապեաններու ընտանիքին, որոնք այդտեղ ապրած են մինչեւ 1915 թուականի Հայոց ցեղասպանութիւնը: Այս մասին՝ ըստ «Արմէնփրես»-ի՝ նման պնդումով թրքական «Միլլիէթ» թերթին մէջ հանդէս եկած է թուրք պատմաբան Պասքըն Օրանը:

Փաստը բարձրաձայնելու պատճառը այն եղած է, որ «Միլլիէթ»-ի Անգարայի բաժնի ղեկավար Սերփիլ Չեւիքճանը իր «Այն օրուան պէս» հրապարակման մէջ նշած է, թէ Թուրքիոյ նախագահական պալատի ներսը գտնուող թանգարան-պալատը «Աթաթուրքին նուիրած են անգարացիները»:

Թերթի ընթերցողներէն Սետաթ Օքթեմը հրապարակման առնչութեամբ նշած է, որ նախագահական պալատը ոչ թէ նուէր է Աթաթուրքին, այլ «ան բռնագրաւուած  է 1915-ին բռնի տեղահանուած Քասապեաններ հայ ընտանիքէն»: Պասքըն Օրան իր հերթին աւելցուցած է, որ Քասապեանները այդ պալատը ոչ մէկին նուիրած են, ոչ ալ վաճառած են: «Պետութիւնը այդ պալատը եւ հայերուն պատկանող բազմաթիւ գոյք խլած է: Ըսուած է, թէ յետագային անոնք կը վերադարձուին, որ տեղի չէ ունեցած: 1919-էն սկսեալ հայերու ձգած գոյքը իշխանութեան կողմէ բռնազաւթուած կամ աճուրդի հանուած է», -նշած է պատմաբանը` աւելցնելով, որ «Միլլիէթ»-ը իր հրապարակման մէջ պէտք է գրեր, որ «այդ պալատը պատկանած է հայ ընտանիքի եւ բռնագրաւուած է պետութեան կողմէ»:

Թուրքիոյ կառավարութիւնը 1983, 2001 եւ 2006 թուականներու հրամանագիրներով «Ազգային անվտանգութեան շահերէն» ելլելով արգիլած է հրապարակել Օգոստոս 1924-էն ետք իրագործուած արձանագրման գործողութիւնները:

Անդրադառնալով հրապարակումին` թուրք գրող Իփէք Չալըշարը նշած է, որ «տունը երկար ժամանակ յիշատակուած է իբրեւ Քասապեաններու առանձնատուն»: «Տարիներ անց այդ ամէնը մոռացուած է: Կը նշուի, որ այդ տունը գնուած է Ռըֆաթ Էֆենտիէն: 2007-ին Քասապեաններու թոռ Էդուարդ Չուխաճըն յայտարարած է, որ «իրենք Չանքայայի պալատը ոչ մէկուն վաճառած են», -յայտնած է Չալըշար:

LEAVE A REPLY

Please enter your comment!
Please enter your name here