Նա/Նէ Լրագրողական Աշխատանքներու 5-րդ Մրցոյթը Պիտի Կայանայ Փետրուարին

0
125

Լրագրողական աշխատանքներու Նա/Նէ 5-րդ յոբելինական մրցոյթը տեղի պիտի ունենայ 2013-ի Փետրուարին:

Մրցոյթին իրենց նիւթերը կրնան ներկայացնել հայաստանեան տպագիր, առցանց եւ հեռարձակող լրատուամիջոցներու աշխատակիցները եւ անկախ լրագրողները: Տպագրուած կամ հեռարձակուած նիւթերը կամ անոնց հեղինակներու թեկնածութիւնը կրնան յառաջադրել նաեւ հասարակական կազմակերպութիւններն ու անհատները: Այս մասին` ըստ Armenpress.am-ի` յայտնած է Բրիտանական խորհուրդի հայաստանեան մասնաճիւղի հանրային կապերու պատասխանատու Արեւիկ Պատալեան, որուն խօսքով` մրցոյթին ներկայացուող նիւթերը պէտք է տպագրուած կամ հեռարձակուած ըլլան 2012 Յունուար-Դեկտեմբեր ժամանակահատուածին, անդրադառնան քաղաքական, հասարակական եւ տնտեսական ոլորտներու մէջ կանանց գործունէութեան, ձեռքբերումներուն ու նուաճումներուն, խնդիրներուն ու մարտահրաւէրներուն` այս ամէնը դիտարկելով տղամարդոց եւ կանանց հաւասարութեան տեսանկիւնէն: Նիւթերը կրնան ներկայացուիլ լրագրութեան իւրաքանչիւր ժանրով:

Յոբելինական Նա/Նէ-ն այս տարի պիտի ունենայ եօթը անուանակարգ: Առաջին մրցանակին համար սահմանուած է Նա/Նէ արծաթէ արձանիկ եւ 300.000 դրամ, 2-րդ մրցանակի համար` հաւաստագիր եւ 150.000 դրամ, 3-րդ մրցանակի համար` հաւաստագիր եւ 75.000 դրամ: Գործընկեր կազմակերպութիւնները այս տարի եւս սահմանած են յատուկ թեմաթիք մրցանակներ, որոնց  յաղթողները պիտի արժանան 100.000 դրամ մրցանակի:

ՄԱԿ-ի Բնակչութեան հիմնադրամը, աջակցելով մրցոյթի անուանակարգերուն, կը սահմանէ յատուկ մրցանակ` «Կանխարգելելի անպտղութիւն` պայմանաւորուած ապորթով կամ սեռավարակներով» թեմայի լաւագոյն լուսաբանման համար:
«World Vision Հայաստան»-ի գրասենեակը սահմանած է յատուկ մրցանակ, որ պիտի տրուի «Մօր եւ մանկան առողջութեան» թեմայի լաւագոյն լուսաբանման համար: Եւրոպական Միութեան կողմէ ֆինանսաւորուող ծրագիրին ծիրէն ներս երկրորդ յատուկ մրցանակը պիտի տրուի «ՄԻԱՎ/ՁԻԱՀ-ի կանխարգելում, իրազեկում, խտրականութեան վերացում» թեմային առնչուող լաւագոյն նիւթին համար:
«Օքսֆամ» հայաստանեան մասնաճիւղը` Աղէտներու վտանգի նուազեցման ծրագիրին ծիրէն ներս սահմանած է յատուկ մրցանակ լաւագոյն տպագիր յօդուածի կամ ռատիոնիւթի համար այն թեմայով, թէ կանայք եւ երիտասարդները ինչպէս կը   պաշտպանեն իրենց համայնքները աղէտներէն: Իսկ Կայուն Կենսապահովման ծրագիրին ծիրէն ներս «Օքսֆամ» հայաստանեան մասնաճիւղը  սահմանած է յատուկ մրցանակ գիւղական համայնքներու մէջ կանանց տնտեսական առաջնորդութեան թեմայով լաւագոյն հեռուստատեսային կամ ռատիօ նախագիծի/ ծրագրի համար:
Հինգերորդ յոբելինական Նա/Նէ լրագրողական մրցոյթը սահմանուած է  յատուկ մրցանակ լրատուամիջոցներու այն աշխատակիցներուն համար, որոնք պիտի մասնակցին այս կամ մասնակցած են նախորդ տարիներու մրցոյթներուն:
Մասնակցելու համար հարկաւոր է գրել պատմութիւններ, որոնք պիտի ներկայացնեն Նա/Նէ մրցոյթին մասնակցելու փորձառութիւնը, մրցոյթին մասնակցելու հետաքրքրութիւնը, ծինային խնդիրներու լուծման հարցու մէջ լրագրութեան դերը եւ թէ ինչպէս ձեր նիւթերը կրնան դրական փոփոխութիւններ յառաջացնել:
Նիւթերը պիտի տեղադրուին Նա/Նէ պլոկին մէջ: Առաւելագոյն մեկնաբանութիւն ստացած հինգ նիւթերու հեղինակները պիտի մասնակցին հարցազրոյցի եւ ժիւրին պիտի ընտրէ յաղթողը: Մրցանակակիրը պիտի այցելէ եւրոպական յառաջատար լրատուամիջոցներէն մէկը եւ պիտի ծանօթանայ ծինային խնդիրներու լուսաբանման անոնց փորձին:

Մրցոյթը նախաձեռնած են Բրիտանական խորհուրդը, Երեւանի մէջ Բրիտանական դեսպանատունը, ԵԱՀԿ երեւանեան գրասենեակը, ՄԱԿ-ի Բնակչութեան հիմնադրամը եւ «World Vision Հայաստան» գրասենեակը, «Օքսֆամ» հայաստանեան մասնաճիւղի, Եւրոպական Միութեան, Հանրային լրագրութեան ակումբի, Պատերազմի եւ խաղաղութեան լուսաբանման ուսումնարանի եւ Հայաստանի երիտասարդ կանանց ընկերակցութեան հետ համատեղ:

LEAVE A REPLY

Please enter your comment!
Please enter your name here