“Լեռնային Ղարաբաղ. Խաղաղութիւն եւ Երկխօսութիւն” Խորագիրով Կլոր Սեղան Ֆրանսայի Ծերակոյտին Նախաձեռնութեամբ

0
161

Ֆրանսայի Ծերակոյտին կողմէ Նոյեմբեր 29-ին կազմակերպուած է կլոր սեղան` “Լեռնային Ղարաբաղ. խաղաղութիւն եւ երկխօսութիւն” խորագրով: Այս մասին կը հաղորդէ News.am-ը:

Հանդիպման մասնակցած են Ֆրանսայի Ծերակոյտի բարեկամական խումբի նախագահ Ֆիլիփ Գալտենպախի նախաձեռնութեամբ պաշտօնական այցով Ֆրանսա գտնուող ՀՀ ԱԺ հայ-ֆրանսական պատգամաւորական բարեկամութեան խումբի անդամները, ֆրանսացի ծերակուտականներ, Ծերակոյտի պաշտօնեաներ, փորձագէտներ եւ լրագրողներ:

Ձեռնարկը բացած է պուլկար լրագրողուհի Ցվետանա Փասգալեւան, որ, իբրեւ ականատես, հանդէս եկած է պատերազմական իրադարձութիւններու մասին պատմող խօսքով, որմէ ետք ցուցադրուած է անոր` “Պիտի բացուի՞ արդեօք առաւօտը Ղարաբաղի մէջ” շարժանկարը:

Այնուհետեւ ծաւալած են քննարկումներ, որոնց ընթացքին ներկայացուած են ԼՂ հիմնախնդրի պատմական եւ աշխարհաքաղաքական կէտերը, առանձին խօսքերով հանդէս եկած են ԵԱՀԿ Մինսքի խումբի նախկին համանախագահ Պեռնար Ֆասիէն, ֆրանսացի եւ հայ պատգամաւորներ, ինչպէս նաեւ պատմաբաններ ու փորձագէտներ:

Կլոր սեղանի մասնակիցները կարեւոր համարած են Արցախի ժողովուրդի անվտանգութիւնը, խստօրէն դատապարտած ռազմատենչ յայտարարութիւնները, ընգծած Սաֆարովի զարհուրելի դէպքին անընդունելիութիւնը` ինչպէս զուտ մարդկային արժէքներու, այնպէս ալ տարածաշրջանին մէջ փոխվստահութեան հաստատման տեսանկիւնէն:

Բանախօսները առանձնակի շեշտած են, որ այլընտրանք չի կրնար ըլլալ խաղաղութեան, եւ որ ներկայիս հրամայականն է նախապատրաստել հասարակութիւնները ոչ թէ պատերազմի, այլ` խաղաղութեան:

 

LEAVE A REPLY

Please enter your comment!
Please enter your name here