Յոյժ Կարեւոր է ԼՂՀ Վերադարձը Ղարաբաղեան Հակամարտութեան Կարգաւորման Գործընթացին. Սերժ Սարգսեան

0
128

ՀՀ ՊՆ Ազգային ռազմավարական հետազօտութիւններու ինստիտուտի եւ Քաղաքական գիտութեան Հայաստանի ընկերակցութեան կողմէ կազմակերպուած «Տարածաշրջանային անվտանգութեան ուժականութիւնը Հարաւային Կովկասի մէջ» ամենամեայ միջազգային գիտական ֆորումին, որ տեղի կ’ունենայ Նոյեմբեր 29-30, ՀՀ Նախագահ Սերժ Սարգսեան ուղերձ յղած է: Ուղերձէն կը ներկայացնենք որոշ հատուածներ.
«Ողջունում եմ «Տարածաշրջանային անվտանգութեան դինամիկան Հարաւային Կովկասում» միջազգային գիտաժողովի մասնակիցներին եւ հիւրերին աւանդական դարձած այս համաժողովի` ամենամեայ ֆորումի վերափոխման կապակցութեամբ: Ֆորումի թեմայի կարեւորութիւնը պայմանաւորուած է ինչպէս տարածաշրջանի երկրների անվտանգութեան շահերով, այնպէս էլ մասնակից մասնագէտների եւ փորձագէտների հեղինակութեամբ:

«Հարաւային Կովկասում ընթացող աշխարհաքաղաքական զարգացումները բարդ եւ դժուար կանխատեսելի են, գտնւում են տարածաշրջանային եւ արտատարածաշրջանային ուժային կեդրոնների շահերի համադրման եւ մրցակցութեան ներքոյ: Այդ հանգամանքը տարածաշրջանի երկրների համար ստեղծում է ինչպէս որոշակի մարտահրաւերներ, այնպէս էլ յաւելեալ հնարաւորութիւններ:

«Հայաստանի արտաքին քաղաքականութիւնը խարսխուած է համաշխարհային եւ տարածաշրջանային դերակատարների հետ փոխշահաւէտ համագործակցութեան, փոխադարձ յարգանքի, շահերի համադրման սկզբունքի վրայ: Մենք համոզուած ենք, որ բաց սահմանները եւ համատեղ տնտեսական ծրագրերի իրականացումը կարող են մեծապէս խթանել փոխադարձ վստահութեան եւ փոխըմբռնման միջավայրի ձեւաւորմանը, հետեւաբար նաեւ քաղաքական խնդիրների լուծմանը: Մինչդեռ քաղաքականութիւնը, որը նպատակաուղղուած է տարածաշրջանի պետութիւնների միջեւ բաժանարար գծերի ստեղծմանը, անխուսափելիօրէն կը յանգեցնի Հարաւային Կովկասում անկայունութեան եւ անվստահութեան միջավայրի ստեղծմանը:

«Տարածաշրջանի առջեւ ծառացած կարեւորագոյն մարտահրաւէրն են չկարգաւորուած հակամարտութիւնները, որոնք պահանջում են համապարփակ լուծում: Հայաստանը համոզուած է, որ առկայ հակամարտութիւնները կարող են լուծուել բացառապես խաղաղ բանակցութիւնների ճանապարհով եւ միջազգային իրաւունքի հիմնարար սկզբունքների հիման վրայ: Հայաստանի Հանրապետութեան համար ղարաբաղեան հակամարտութեան խաղաղ լուծման միակ ընդունելի հարթակը Մինսքի խմբի ձեւաչափն է: Ցանկանում եմ յատուկ ընդգծել, որ տարածաշրջանում երկարաժամկէտ խաղաղութեան ու կայունութեան հաստատմանը կարելի է հասնել միայն Լեռնային Ղարաբաղի բնակչութեան ֆիզիքական անվտանգութեան եւ սեփական ճակատագիրը ինքնուրոյն որոշելու իրաւունքի երաշխաւորուած ապահովման դէպքում: Այս առումով յոյժ կարեւոր է ԼՂՀ վերադարձը ղարաբաղեան հակամարտութեան կարգաւորման գործընթաց:

«Տարածաշրջանային անվտանգութեան դինամիկային նուիրուած ամենամեայ միջազգային գիտական ֆորումին մաղթում եմ յաջողութիւններ եւ արդիւնաւէտ աշխատանքէ:

LEAVE A REPLY

Please enter your comment!
Please enter your name here