Հալէպի Մէջ Դարձեալ Հայ Կին Մը Զոհուած Է

0
149

Հալէպի Թելեֆոն Հաուա թաղամասի մէջ պատահական գնդակէ զոհուած է հայ կին մը: Այս մասին «Արմենփրէս»-ին տեղեկացուցած է Բերիոյ թեմի ազգային առաջնորդարանի մամուլի քարտուղար Ժիրայր Ռէյիսեան` աւելցնելով, որ զոհը կը  կոչուի Մարիէթ Տոշողլանեան-Պաճեքեան : 

Անդրադառնալով Հալէպի մէջ տիրող իրավիճակին` Ռէյիսեան նշած է, որ քաղաքի կեդրոնական թաղամասերուն մէջ համեմատաբար հանդարտ է, կրակոցներու եւ պայթիւններու ձայներ կը լսուին ծայրամասերու մէջ: Նոր Գիւղ հայկական թաղամասին մէջ եւս վերջին երկու օրերու ընթացքին իրավիճակը աւելի հանգիստ է, սակայն ռմբակոծութիւնները կը շարունակուին թաղամասին մօտ գտնուող Պուսթան Պաշայի մէջ: Ռէյսիեանի խօսքով` արձակազէններու վտանգը տակաւին առկայ է եւ ամէն վայրկեան կարելի է անակնկալներ սպասել: Բախումները կը շարունակուին նաեւ Հալէպի օդակայանի ճանապարհին:

Մամլոյ քարտուղարը նաեւ աւելցուցած է, որ Հալէպի մէջ ելեկտրականութեան ընդհատումները յաճախակի դարձած են: Արդէն յայտնի է նաեւ, որ Սուրիոյ մէջ համացանցը եւ հեռախօսակապը վերականգնուած են: Ռէյիսեան նաեւ տեղեկացուցած է, թէ բնակիչներու կենցաղային դժուարութիւնները եւ մտահոգութիւնները  աւելի ակնյայտ դարձած են, առօրեայ անհրաժեշտութիւները  աւելի դժուարութեամբ կը հայթայթուին:

 

LEAVE A REPLY

Please enter your comment!
Please enter your name here