Հայ Գիրքը Մեր Կեանքին Մէջ Եղած է Կենդանի ու Կենդանարար Ներկայութիւն. Արամ Ա.

0
168

Մեծի Տանն Կիլիկիոյ Արամ Ա. կաթողիկոսին հանդիսապետութեամբ, Դեկտեմբեր 2-ին, Տըպպայէի «Սիրան Մանուկեան» սրահին մէջ տեղի ունեցաւ հայ գիրքի փառաբանանքի երեկոյ «Հայ գիրքի տարուան» առիթով: Այս մասին կը յայտնէ Լիբանանի ՙԱզդակ՚ օրաթերթը։

Ձեռնարկի ընթացքին ելոյթ ունեցաւ կաթողիկոսարանի «Շնորհալի» երգչախումբը` խմբավարութեամբ Թորգոմ վրդ. Տօնոյեանի, դաշնակի ընկերակցութեամբ Տաթեւիկ Արթինեանի: Մէկ ժամուան տեւողութեամբ երգչախումբը ներկայացուց փունջ մը երգեր, որոնց մէջ կը փառաբանէին հայ գիրքը եւ հայոց լեզուն, ինչպէս` «Հայոց տառեր», «Խօսք իմ որդուն», «Ով մեծասքանչ», նաեւ ժողովրդական երգեր, ինչպէս` «Կռունկ», «Այ իմ վարդին» եւ այլն: Յայտագիրի ընթացքին ասմունքով ելոյթ ունեցաւ Իրմա Գապաքեան-Տէտէեան, որ մեկնաբանեց Զահրատի «Մեսրոպաբոյր», Վահան Թէքէեանի «Լեզուն որով գրեցի» եւ տոքթ. Մեզպուրեանի «Ով մեծասքանչ դու լեզու» քերթուածները: Ասմունքով հանդէս եկան նաեւ Համբարձում սրկ. Պալըքճեան` «Գիւտին փառքը» (Սիամանթօ) քերթուածով եւ Սեբաստիա սրկ. Ղարախանեան` «Մեր այբուբենը» (Գէորգ Էմին) քերթուածով: Ձեռնարկին իրենց մասնակցութիւնը բերին նաեւ Յասմիկ Գասպարեան` դաշնակով, Խաժակ Խաչատուրեան` ջութակով, իսկ Գարեգին աբղյ. Շխրտըմեան ընթերցեց հատուածներ Արամ Ա. վեհափառ հայրապետին «Հայ գիրքի տարուան» հռչակագիրին:   Ձեռնարկի եզրափակիչ խօսքը արտասանեց վեհափառ հայրապետը, որ նկատել տուաւ, թէ «Շնորհալի» երգչախումբը տարբեր հմայք ունէր սոյն երեկոյին ընթացքին, որովհետեւ անիկա սովորական համերգ մը չէր, այլ` հայ գիրքի փառաբանանքն էր, հայ գիրքի սրբազան պատարագն էր: «Հայ գիրքի փառաբանանքը կատարուած է մեր ամբողջ պատմութեան ընթացքին…հայ գիրքը մեր կեանքին մէջ եղած է կենդանի ու կենդանարար ներկայութիւն», հաստատեց վեհափառ հայրապետը` աւելցնելով, որ հայ գիրքը սովորական երեւոյթ մը չէ հայ կեանքին մէջ. հայ գիրքը տարբեր է իր ոգիով, խորհուրդով, պատգամով: «Հայ գիրքին մէջ կայ հայու հոգին, հայու հաւատքը, հայու կամքը, հայու տեսիլքը… Անիկա հայութիւնը կը պաշտպանէ, հայութեան դիմագիծը կը պահէ», շեշտեց վեհափառ հայրապետը: Ան ընդգծեց, որ հայ եկեղեցին հայ գիրքը վերածած է սրբազան արժէքի մը, որովհետեւ հայ գիրքը պահած ու պաշտպանած է հայ ժողովուրդը կեանքի փոթորիկներուն դիմաց: «Առանց հայ գիրքին մեր կեանքը դատարկ է, մեր կեանքին ճամբան մութ է, անիմաստ եւ անդիմագիծ է մեր կեանքը», հաստատեց Արամ Ա. կաթողիկոս եւ նկատել տուաւ, որ սոյն համերգին ընդմէջէն Իրենք կ՛ուղղեն հետեւեալ պատգամը. «Հայ գիրք կարդացէ՛ք, հայ գիրք գրեցէ՛ք, որպէսզի հայ գիրքով մեր ժողովուրդը աւելի պայծառանայ, աւելի հայանայ, որովհետեւ հայ գիրքն է մեր ժողովուրդի անմահութեան ճամբան»: Եզրափակելով իր խօսքը` վեհափառ հայրապետը հաստատեց, որ հայ գիրքը կենարար է մեր կեանքին մէջ քրիստոնէական եւ ազգային իմաստով: Ձեռնարկը փակուեցաւ «Կիլիկիա» մաղթերգով:

LEAVE A REPLY

Please enter your comment!
Please enter your name here