Դատաւորները Կ՛որոշեն Եգիպտոսի Սահմանադրական Հանրաքուէն Հսկել

0
137

 Մինչ Եգիպտոսի նախագահ Մուհամմատ Մուրսիի ընդդիմադիրները կը պատրաստուէին Երեքշաբթի, Դեկտեմբեր 4-ին կայանալիք ցոյցերու եւ ընդհանուր գործադուլի, Դատաւորներու գերագոյն խորհուրդը յայտարարեց, թէ որոշած է հսկել Դեկտեմբեր 15-ին նախատեսուած սահմանադրական հանրաքուէին կայացման:
Միւս կողմէ, Եգիպտոսի Գերագոյն ատեանը Կիրակի օր յայտարարած էր, որ իր դիմագրաւած «հոգեբանական ճնշում»ին դէմ իբրեւ բողոք, անորոշ թուականով կը դադրեցնէ իր աշխատանքը: Մուրսիի համակիր ցուցարարները նոյն օրը արգելք հանդիսացած էին՝ սահմանադրութեան նոր բանաձեւին շուրջ վճիռ արձակելու համար դատաւորներու կողմէ ժողովի գումարման: Մուրսիի համակիրները կ՛ուզէին արգելք հանդիսանալ որեւէ վճիռի, որ հարցականի տակ կ՛առնէր Մուրսիի հրապարակած եւ իսլամականներու հակակշիռին տակ գտնուող մարմինի մը կողմէ պատրաստուած նոր սահմանադրութեան օրինականութիւնը:
Մուրսի համապարփակ լիազօրութիւններ ստանձնեց եւ արդարադատութիւնը զրկեց նախագահին որոշումները վիճարկելու իշխանութենէն՝ բողոքի ալիք մը պատճառելով:
Մուրսի կը յուսայ ցոյցերը զսպել նոր սահմանադրութեան վաւերացումով, սակայն ընդդիմադիրները կ՛ըսեն, թէ նշեալ նախագիծը հիմնական ազատութիւնները կ՛ոտնակոխէ: Մինչ այդ, բազմաթիւ ընդդիմադիրներ կը շարունակեն Գահիրէի Թահրիր հրապարակին վրայ իրենց բաց նստացոյցը:

 

LEAVE A REPLY

Please enter your comment!
Please enter your name here