Իսրայէլ Կ՛անտեսէ Բնակեցման Վայրերու Գծով Քննադատութիւնները

0
143

 Իսրայէլի իշխանութիւնները յայտարարեցին, թէ որոշած են անտեսել համաշխարհային ու յատկապէս եւրոպական ճնշումները եւ թէ պիտի շարունակեն ապօրինի բնակեցման վայրեր կառուցել պաղեստինեան գրաւեալ հողերուն վրայ:
Եւրոպական Միութեան անդամ շարք մը պետութեանց արտաքին գործոց նախարարութիւնները կանչած էին այդ երկիրներուն մօտ Իսրայէլի դեսպանները, որոնց բողոք արտայայտուած էր Իսրայէլի այս որոշումին դէմ:
Եւրոպական Միութեան արտաքին քաղաքականութեան հարցերով յանձնակատար Քաթրին Աշթըն դատապարտեց բռնագրաւեալ Արեւմտեան Ափի եւ Երուսաղէմի մէջ իսրայէլացիներու համար 3000 նոր տուներ կառուցելու Իսրայէլի ծրագիրը: Ան ըսաւ. «Առնչակից կողմերուն կոչ ուղղեցի բանակցութիւններու վերսկսման համար վստահութեան վերականգնման ուղղութեամբ քայլեր որդեգրելու»: Աշթըն բնակեցման վայրերու ընդարձակումը խաղաղութեան հաստատման դէմ հարուած մը նկատեց:
Միացեալ Նահանգներու արտաքին գործոց նախարար Հիլարի Գլինթըն քննադատեց իսրայէլեան որոշումը՝ զայն խաղաղութեան հոլովոյթին համար «մէկ քայլ ետ» նկատելով: Ռուսիա եւս դատապարտեց որոշումը եւ Իսրայէլի կոչ ըրաւ վերատեսութեան ենթարկելու զայն:
Իսրայէլ այս որոշումը առած էր՝ հակադարձելով ՄԱԿ-ի Ընդհանուր Ժողովին կողմէ Պաղեստինը իբրեւ դէտ պետութիւն ճանչնալու որոշումին:Իսրայէլի ելեւմուտքի նախարարութիւնը նաեւ որոշած է Պաղեստինեան իշխանութեան համար գանձուած տուրքերուն գումարները սառեցնել: Դադրած է գումարներուն փոխանցումը պաղեստինցիներուն:
Մինչ այդ, ՄԱԿ-ի Ընդհանուր ժողովը Իսրայէլէն դարձեալ պահանջեց հեռանալ բռնագրաւուած Կոլանի բարձունքներէն եւ հրաժարիլ Երուսաղէմը իբրեւ իր մայրաքաղաքը հռչակելու քայլէն՝ նշելով, որ «որեւէ որոշում, զոր Իսրայէլ կ՛որդեգրէ, իբրեւ բռնագրաւող պետութիւն իր օրէնքները, գերիշխանութիւնը եւ կամքը Երուսաղէմին պարտադրելու համար, ապօրինի է եւ իրաւական ոչ մէկ ուժ ունի»:

 

LEAVE A REPLY

Please enter your comment!
Please enter your name here