ԿԻՊՐՈՍԻ ԽՈՐՀՐԴԱՐԱՆԻ ՆԱԽԱԳԱՀԸ ԱՆԹԻԼԻԱՍԻ ՄէՋ

0
120

 

• «ԿԸ ՄԵՐԺԵՆՔ ԹՈՒՐՔԻՈՅ ՈՒՐԱՑՈՒՄԻ ՔԱՂԱՔԱԿԱՆՈՒԹԻՒՆԸ ԵՒ ԹԱՓԱՆՑՈՒՄԸ ՇՐՋԱՆԷՆ ՆԵՐՍ»

 

                                                                                           ԱՐԱՄ Ա. ԿԱԹՈՂԻԿՈՍ

 

• «ԿԻՊՐՈՍԸ ԹԻԿՈՒՆՔ ԿԸ ԿԱՆԳՆԻ ՀԱՅ ԺՈՂՈՎՈՒՐԴԻ ԱՐԴԱՐ ԻՐԱՒՈՒՆՔՆԵՐՈՒՆ»

 

                                                                                                             Յ. ՕՄԵՐՈՒ

 

Երեքշաբթի 4 Դեկտեմբեր 2012-ի առաւօտուն, Ն.Ս.Օ.Տ.Տ. Արամ Ա. Կաթողիկոս Անթիլիասի Մայրավանքի Վեհարանին մէջ ընդունեց պաշտօնական այցելութիւնը Կիպրոսի Խորհրդարանի Նախագահ Եաննաքիս Օմերունի: Խորհրդարանի նախագահի պատուիրակութեան մաս կը կազմէին` Լիբանանի մօտ Կիպրոսի դեսպան Հ. Մավրօմաթիս, Խորհրդրարանի Ընդհ. Քարտուղար Վ. Անաստասիատու, Կիպրոսի Նախագահին պալատի տնօրէն Ա. Քութալանոս, Խորհրդարանի միջազգային յարաբերութեան յանձնաժողովի ատենապետ Է. Հաճիեանի եւ Խորհրդարանի Նախագահի խորհրդական Ճ. Փոփաքիրիաքու: Վեհափառ Հայրապետին կողքին հանդիպման ներկայ էին Ազգ. Կեդրոնական Վարչութեան Ատենապետ Տքթ. Պետրոս Գարաճրճեան, Ատենադիրպիր Պրն. Տիգրան Ճինպաշեան եւ երեսփոխաններ Յակոբ Բագրատունի, Ժան Օղասապեան, Արթիւր Նազարեան, Սեպուհ Գալփաքեան, Շանթ Չինչինեան: Յայտնենք նաեւ, որ Խորհրդարանի Նախագահին կ՛ընկերանային Կիպրոսէն խումբ մը թղթակիցներ:

Ողջունելով Խորհրդարանի Նախագահին այցելութիւնը, Վեհափառ Հայրապետը ըսաւ, թէ Կիլիկեան շրջանէն սկսեալ քաղաքական, տնտեսական, կրօնական ու մշակութային իմաստով յատուկ կապեր գոյութիւն ունեցած են հայ եւ կիպրացի ժողովուրդներուն միջեւ: Այս կապերը հետագային աւելի զարգացան եւ այսօր ներկայ ընկերութիւնը յուզող հարցերուն շուրջ մեր երկու ժողովուրդները հասարակաց տեսակէտներ ու կեցուածքներ ունին: Նո՛յնն է պարագան, ըսաւ Վեհափառ Հայրապետը, հայ եւ յոյն եկեղեցիներուն, որոնց միջ–եկեղեցական յարաբերութիւնն ու գործակցութիւնը վերանորոգ կերպով կը շարունակուին: Վեհափառը ընդգծեց, որ Կիպրոս մէջ մեր համայնքը իր գործօն մասնակցութիւնը կը բերէ կղզիի բարգաւաճման` քաղաքական, տնտեսական, մշակութային ու ընկերային բնագաւառներէն ներս:

Վեհափառը նաեւ անդրադարձաւ Հայաստանի ու Կիպրոսի միջեւ գոյութիւն ունեցող սերտ գործակցութեան: Մեր գործակցութիւնը ամրացնող պատմական կապերը պէտք է աւելի ամրապնդուին ներկայ աշխարհի հրամայականներուն դիմաց, շեշտեց Վեհափառ Հայրապետը, «այսօր մանաւանդ, երբ Թուրքիոյ ծաւալապաշտական քաղաքականութիւնը կը շարունակուի ոչ միայն Կիպրոսէն, այլ ամբողջ շրջանէն ներս: Թուրքիան արդարութեան մասին կը խօսի սակայն ինք դարձած է անարդարութեան ռահվիրան: Թուրքիան բռնագրաւման դէմ կ՛արտայայտուի, սակայն ինք բռնագրաւուած կը պահէ Կիպրոսին կէսը: Թուրքիան մարդկային իրաւունքներու ջատագով կը ներկայանայ միջազգային համայնքին, սակայն իր երկրէն ներս ան կ՛անտեսէ մարդկային տարրական իրաւուննքները: Միջին Արեւելքէն ներս Թուրքիոյ թափանցումը, շրջանի երկիրներու ներքին կեանքին իր միջամտութիւնը փաստօրէն հեռաւոր նպատակներ հետապնդելու նշաններ են» ըսաւ Վեհափառ Հայրապետը: Ուստի, ըսաւ Վեհափառը, հարկ է Հայաստան ու Կիպրոս մեր եկեղեցիներն ու ժողովուրդները գործակցին, որպէսզի արգելք հանդիսանանք Թուրքիոյ Եւրոպական Համայնք մուտք գործելու ճիգերուն:

Վեհափառը խօսեցաւ նաեւ Կիպրոսի Թուրքիոյ կողմէ գրաւեալ հողերուն վրայ գտնուող հայկական եկեղեցիներուն ու կալուածներուն, յատկապէս Սուրբ Մակարայ վանքին, Սուրբ Աստուածածին եկեղեցւոյ, Ազգ. Առաջնորդարանին, վարժարանին եւ ընդհանրապէս հայ ժողովուրդին սեփականութիւնը եղող համայնքային թէ անհատական կալուածներու հարցի մասին: Վեհափառը ըսաւ, որ «Կիպրոսի մեր ժողովուրդը օրինաւոր սեփականատէրն է այդ բոլորին: Թուրքիան իրաւունք չունի գրաւուած պահելու, զանոնք քանդելու, գործածելու կամ վարձու տալու. նման արարքներ դէմ են միջազգային օրէնքին: Քաջատեղեակ ենք, որ Կիպրոսի կառավարութիւնը հետեւողական կերպով կը հետապնդէ այս հարցը եւ վստահ ենք որ վերանորոգ թափով պիտի շարունակէ իր աշխատանքը միջազգային համայնքէն ներս»:

Պատասխանելով Վեհափառ Հայրապետին խօսքին, Կիպրոսի Խորհրդարանի Նախագահը ինք եւս յատուկ կարեւորութեամբ անդրադարձաւ հայ եւ կիպրացի ժողովուրդներու դարաւոր յարաբերութեան, շեշտելով այդ յարաբերութիւնը աւելի ծաւալելու անհրաժեշտութիւնը: Այս ծիրէն ներս, Խորհրդարանի Նախագահը նաեւ ընդգծեց եկեղեցիներուն դերը մանաւանդ մարդկային իրաւունքներու բնագաւառէն ներս: Ան նաեւ լայնօրէն խօսեցաւ Կիպրոսէն ներս թրքական գրաւումին ու անոր ժխտական հետեւանքներուն մասին` յայտնելով, որ Կիպրոսի պետութեան համար այս հարցը կը մնայ մնայուն առաջնահերթութիւն: «Թուքիան, որպէս գրաւեալ ուժ կը շարունակէ քանդել կրօնական ու մշակութային կառոյցները ու այլափոխել Կիպրոսի գրաւեալ շրջանի դիմագիծը» ու ձայնակցելով Վեհափառ Հայրապետին շեշտեց միասնաբար պայքարելու հրամայականը` ի խնդիր արդարութեան:

Ապա Վեհափառ Հայրապետը, Խորհրդարանի Նախագահը եւ ներկաները ուղղեուեցան Մայր Տաճար ու նահատակաց յուշարձան, ուր Վեհափառ Հայրապետը հոգւոց արտասանեց` ի հանգիստ ցեղասպանութեան զոհ գացած մեր մէկուկէս միլիոն նահատակներուն:

LEAVE A REPLY

Please enter your comment!
Please enter your name here