Սուրիահայ Ուսանողներու Ուսման Վարձերը Պիտի Փոխհատուցուին

0
165

  ՀՀ կառավարութիւնը Նոյեմբեր 29-ին որոշում ընդունած է , ըստ որուն` Հայաստանի երիտասարդական հիմնադրամէն 100 միլիոն դրամ կը յատկացուի ` «Հայաստանի Հանրապետութեան բարձրագոյն ուսումնական հաստատութիւններու անվճար համակարգին մէջ չընդգրկուած, բարձր առաջադիմութիւն եւ հասարակական աշխուժութիւն ունեցող առաջին եւ երկրորդ տարիներու ուսանողներուն կրթաթոշակներու տրամադրում» ծրագիրը իրականացնելու համար:

Հիմնադրամի մամուլի ծառայութեան հաղորդումով՝ յատկացուած 100 միլիոն դրամէն 60 միլիոն դրամը պիտի տրուի ՀՀ ուսանողներու ուսման վարձերու փոխհատուցման ծրագրի համար, իսկ 40 միլիոն դրամը` սուրիահայ ուսանողներու ուսման վարձերու փոխհատուցման համար:

Ուսանողները, դիմելով Հայաստանի երիտասարդական հիմնադրամ եւ համապատասխանելով որոշակի չափանիշներու, մրցութային կարգով պիտի ստանան ուսման վարձի փոխհատուցում: Ծրագրի իրականացումը կը նպաստէ կրթութեան մատչելիութեան, կ’արժեւորէ կրթուած ըլլալու գաղափարը, ինչ որ դրական ազդեցութիւն կ’ունենայ երիտասարդ սերունդի ապագան կերտելու հարցով:

Ուսման վարձերու փոխհատուցման ծրագիրը Հայաստանի երիտասարդական հիմնադրամը կ’իրականացնէ արդէն 3-րդ տարին ըլլալով: 2011-ին նման աջակցութիւն ստացած է 600 ուսանող, 2012-ին` 750: 2012-ին կրթաթոշակ ստանալու մրցոյթին դիմած էր հանրապետութեան պետական համալսարաններու աւելի քան 1800 ուսանող, որոնց` շուրջ 100-ը առաջին, 1700-ը` երկրորդ տարուան ուցանողներ: Համեմատութեան համար ըսենք, որ 2011թ. կրթաթոշակ ստանալու մրցոյթին դիմած էր 800 ուսանող:

Յառաջիկային Հայաստանի երիտասարդական հիմնադրամը ՀՀ ուսանողներուն համար պիտի յայտարարէ մրցոյթին մասնակցելու կարգը: Սուրիահայ ուսանողները ուսման վարձի աջակցութիւնը պիտի ստանան երկու շաբաթէն:

 

LEAVE A REPLY

Please enter your comment!
Please enter your name here