Փութին Եւ Էրտողան Տարակարծիք Կը Մնան Սուրիոյ Հարցով

0
115

Թուրքիա այցելած Ռուսիոյ նախագահ Վլատիմիր Փութինի եւ Թուրքիոյ վարչապետ Ռեճէպ Թայիփ Էրտողանի միջեւ կայացած խորհրդակցութիւններէն ետք յայտարարուեցաւ, թէ երկու երկիրները կը շարունակեն տարակարծիք մնալ Սուրիոյ իրադարձութիւններուն կապակցութեամբ, սակայն որոշած են այդ տարակարծութիւնները ժամանակաւորապէս մէկ կողմ դնել, որպէսզի անոնք վնաս չհասցնեն երկու երկիրներուն միջեւ զարգացող տնտեսական յարաբերութեանց:
Փութին Թուրքիա կ՛այցելէր մասնակցելու համար ռուս-թրքական համագործակցութեան բարձրաստիճան խորհուրդի 3-րդ ժողովին, որ Հոկտեմբերին տեղի պիտի ունենար, սակայն յետաձգուած էր՝ Ռուսիայէն Սուրիա թռիչքի ընթացքին՝ Թուրքիոյ մէջ վայրէջք կատարելու պարտադրուած սուրիական օդանաւին ստեղծած տագնապին պատճառով:
Փութին յայտարարեց, թէ աշխատանք պիտի տարուի, որպէսզի անցեալ տարի 32 միլիառ տոլարի հասած երկկողմանի առեւտուրը քանի մը տարիէն հասնի մինչեւ 100 միլիառ տոլարի: Կ՛ակնկալուի, որ այս տարուան առեւտուրը 35 միլիառ տոլարի շուրջ ըլլայ:
Փութին նաեւ անուղղակիօրէն մտահոգութիւն յայտնեց «Փեթրիոթ» տիպի հրթիռներ Սուրիոյ սահմանին մօտերը տեղադրելու Թուրքիոյ որոշումին առթիւ:
Յայտնենք, թէ Փութինի այցելութեան ընթացքին քանի մը ցոյցեր տեղի ունեցած են անոր դէմ: Ցուցարարները դատապարտած են Սուրիոյ իշխանութեանց նեցուկ կանգնելու եւ Կովկասի մէջ Փութինի որդեգրած քաղաքականութիւնը:

 

LEAVE A REPLY

Please enter your comment!
Please enter your name here