Օսկանեանի Գործողութիւններուն մէջ Յանցանքի Տարրերը Կը Բացակային. Ռուսիոյ Ակադեմիայի եւ Իրաւունքի Ինստիտուտ

0
130

 Ռուսիոյ Գիտութիւններու Ակադեմիայի Պետութեան եւ Իրաւունքի ինստիտուտը իրաւական եզրակացութիւն ներկայացուցած է ՀՀ կառավարութեան առընթեր ազգային անվտանգութեան ծառայութեան կողմէ «Փողերու լուացման» յատկանիշներով յարուցուած քրէական գործի վերաբերեալ, որ կ’առնչուի «Սիվիլիթաս» հիմնադրամին եւ անոր հիմնադիր Վարդան Օսկանեանին: Սիվիլիթաս հիմնադրամը հաղորդագրութիւն տարածած է, ուր եզրակացութեան որոշ հատուածներ ներկայացուած են թարգմանաբար:

«Վարդան Մ. Օսկանեանի գործողութիւններուն մէջ հակաիրաւականութեան տարրի առկայութեան համար անհրաժեշտ է հաստատել, որ ան իրեն վստահուած դրամական միջոցները օգտագործած չէ շահադիտական նպատակներով: Օսկանեանի կողմէ աւանդ դրուած գումարէն ստացուած եկամուտը չի կրնար որակուիլ իբրեւ եկամուտի ստացում այնքան ժամանակ, քանի դեռ չէ ապացուցուած այդ եկամուտին օգտագործումը ի շահ իրեն:

««Սիվիլիթաս» հիմնադրամի հոգաբարձուներու խորհուրդի անդամ Տիգրան Կարապետեանէն ստացուած դրամական միջոցներու պահումը Օսկանեանի հաշուեհամարին` անոր անձնական միջոցներուն հետ մէկտեղ, եւ յետագային այդ միջոցներու տնօրինումը իրաւաչափ է, քանի որ դրամական միջոցները ունին փոխադարձ փոխարինելիութեան յատկանիշ, եւ այնքան ժամանակ, քանի դեռ Օսկանեանի գոյքային դրութիւնը (հաշուի առնելով անոր բոլոր հաշիւները` չսահմանափակուելով տուեալ մէկ հաշուեհամարին մէջ առկայ միջոցներով) թոյլ կու տայ կատարել ստացուած միջոցներու` բարեգործական նպատակներով տնօրինման վերաբերեալ քաղաքացիական իրաւական պարտաւորութիւնը, Օսկանեան կը գործէ իրաւաչափ:

«Օսկանեանի հաշուեհամարին պահուող դրամական միջոցներէն դրամատնային տոկոսադրոյքի ստացումը իրաւաչափ է, քանի որ կուտակուած տոկոսային եկամուտը փոխանցուած է հիմնադրամի հաշուեհամարին միւս դրամական միջոցներուն հետ, որոնք պատկանած են Օսկանեանին, այսինքն` վերջինս չէ ստացած որեւէ գոյքային եկամուտ այդ միջոցներու պահումէն:

«Այն փաստը, որ Կարապետեանէն ստացուած գումարը անմիջապէս չէ փոխանցուած Հիմնադրամի հաշուեհամարին, չի հակասեր ՀՀ քաղաքացիական օրէնսդրութեան, քանի որ պայմանաւորուածութեան համաձայն` Օսկանեան իրաւասու էր գումարը տնօրինել սեփական հայեցողութեամբ` Հիմնադրամի շահերէն մեկնելով` առանց սահմանուած ժամկէտներու:

«Հետեւաբար` Օսկանեանի` որպէս մեղադրանք առաջադրուող վերոյիշեալ գործողութիւնները կը համապատասխանեն ՀՀ քաղաքացիական օրէնսդրութեան, ուստի` իրաւաչափ են, որ կը բացառէ անոնց որակումը իբրեւ իւրացում:

«Օսկանեան օրինական կերպով տնօրինած է բարեգործական նպատակներով իրեն փոխանցուած գումարը` մինչեւ Կարապետեանի եւ նուիրատուի առջեւ ստանձնած պարտաւորութեան կատարման պահը: Վիճելի գումարը տնօրինելու ժամանակաշրջանին մէջ Օսկանեան եւ ոչ մէկ անգամ գումարը օգտագործած է իր օգտին:

«Ներկայացուած փաստաթուղթերու ուսումնասիրութեան արդիւնքով պարզուած է, որ Օսկանեանի գործողութիւններուն մէջ կը բացակային յանցակազմի յատկանիշները` նախատեսուած ՀՀ ՔՕ 179-րդ յօդուածով, այն է ` գործողութիւններու հակաիրաւականութիւն, յանցագործի կամ այլ անձերու կողմէ գոյքի անհատոյց օգտագործում, որպէս յանցագործութեան հետեւանք` սեփականատիրոջը վնասի պատճառում:
«Ինչ կը վերաբերի յանցակազմի յատկանիշներուն, որոնք նախատեսուած են ՀՀ ՔՕ 190-րդ յօդուածով («յանցաւոր ճանապարհով ստացուած եկամուտներու օրինականացում»), ապա դրամական միջոցները, որոնց օրինականացման մէջ կը մեղադրուի Օսկանեանը, ձեռք բերուած են նուիրատուութեան պայմանագիրով, ունին ծագման օրինական աղբիւր, փոխանցուած են անկանխիկ` նշանակելով վճարման այն կարգը, որ կը համապատասխանէ կողմերուն կողմէ հետապնդուող եւ իրականացուող գործարքներու իրական տնտեսական իմաստը արտացոլող իրական շուկայական նպատակին:

«Վերոգրեալէն կ’եզրակացնենք, որ կողմերը Օսկանեանի կողմէ վերոյիշեալ դրամական միջոցներու տնօրինման օրինական տեսք հաղորդելու նպատակ չեն հետապնդած»:

«Վերը նշուած փաստարկներն ու հանգամանքները` իրենց համակարգային փոխկապակցուածութեան մէջ, թոյլ կու տան ընել այն եզրահանգումը, որ սոյն եզրակացութեան նախաբանին մէջ նկարագրուած` Վարդան Մ. Օսկանեանի գործողութիւններուն մէջ Հայաստանի Հանրապետութեան քրէական օրէնսգիրքի 179, 190 յօդուածներով նախատեսուած յանցակազմի տարրերը ԿԸ ԲԱՑԱԿԱՅԻՆ»:

 

LEAVE A REPLY

Please enter your comment!
Please enter your name here