Ազգային Ժողովը Ընդունեց 2013 Թուականի Պետական Պիւտճէի Նախագիծը

0
120

  ՀՀ Ազգային ժողովը ձայներու 71 կողմ, 37 դէմ, 0 ձեռնպահ յարաբերակցութեամբ Դեկտեմբերի 5-ի նիստի ընթացքին ընդունեց Հայաստանի Հանրապետութեան 2013-ի պետական պիւտճէի նախագիծը: «Արմենփրէս»-ի հաղորդումով` Ազգային ժողովի նախագահ Յովիկ Աբրահամեան յիշեցուցած է, որ նախագիծը ընդունելու համար բաւարար էր քուէարկողներու 50 + 1-ի կողմ քուէարկութիւնը:

ՀՀ ելեւմուտքի նախարար Վաչէ Գաբրիէլեան Դեկտեմբեր 4-ի նիստին ներկայացուցած էր պիւտճէի նախագիծի վերջնական տարբերակը եւ ամփոփաթերթին մէջ ներառուած առաջարկները: Ան տեղեկացուցած էր, որ պիւտճէի նախագիծին վերաբերեալ ԱԺ յանձնաժողովներէն, խմբակցութիւններէն եւ անհատ պատգամաւորներէն ստացած են 406 առաջարկներ, որոնց հիմնական մասը կը վերաբերի տարբեր յատկացումներ նախատեսելուն, յատկացուող գումարները աւելցնելուն եւ հարկապիւտճետային քաղաքականութեան:

Քննարկման արդիւնքով ընդունուած են 67 առաջարկներ, իսկ 207 առաջարկներու լուծումը հնարաւոր է համարուած է յաջորդ տարուան պիւտճէով կամ միջնաժամկէտ ծրագիրով: ՀՀ կառավարութիւնը առաջարկած է կարգ մը ոլորտներու մէջ աւելցնել եկամտային եւ ծախսային մասերը: Պիւտճէի վերջնական տարբերակին մէջ կ’առաջարկուի եկամուտները սահմանել 1 թրիլիոն 32 միլիառ 800 միլիոն դրամ իսկ ծախսերը` 1 թրիլիոն 152 միլիառ 600 միլիոն դրամ: Այսինքն` պիւտճէի եկամտային եւ ծախսային մասերը սկզբնականի համեմատութեամբ համապատասխանաբար աւելցած են 1,2 միլիառ դրամով:

LEAVE A REPLY

Please enter your comment!
Please enter your name here