ՆԱԹՕ Կ՛որոշէ «Փեթրիոթ»ներ Հաստատել Թուրքիոյ Մէջ

0
121

ՆԱԹՕ-ի հրամանատարութիւնը Սուրիոյ կառավարութիւնը զգուշացուց սուրիացի ժողովուրդին դէմ քիմիական զէնք օգտագործելէ, կրկնելով Միացեալ Նահանգներու նախագահ Պարաք Օպամաի եւ արտաքին գործոց նախարար Հիլարի Գլինթընի կողմէ կատարուած ազդարարութիւնները, ըստ որոնց, քիմիական զէնքերու օգտագործումը կրնայ միջամտութեան առաջնորդել:
Նոյն օրը հաղորդուեցաւ, թէ ՆԱԹՕ-ի անդամ պետութեանց արտաքին գործոց նախարարները որոշած են դրական պատասխան տալ «Փեթրիոըթ» տիպի հրթիռներ Թուրքիոյ մէջ զետեղելու կապակցութեամբ Անգարայի կատարած դիմումին, պնդելով, թէ հրթիռները «զուտ պաշտպանութեան» նպատակներով պիտի հաստատուին: Միացեալ Նահանգներու արտաքին գործոց նախարարութենէն բարձրաստիճան պաշտօնատար մը յայտարարեց, որ այս համակարգներու տեղակայումը «քանի մը շաբաթ պիտի պահանջէ»:
Քիմիական զէնքերու հարցը դարձեալ օրակարգի նիւթ դարձած է, երբ Սուրիոյ նախագահ Պաշշար Ասատի նախկին մերձաւորներէն Մանաֆ Թլաս բրիտանական «Սանտէյ Թայմզ» օրաթերթին հետ հարցազրոյցի մը ընթացքին յայտարարած էր, որ Ասատ, իր վարչակարգի տապալման վերջին օրերուն կրնայ ժողովուրդին դէմ քիմիական զէնք օգտագործելու հրահանգ արձակել:
Սուրիոյ արտաքին գործոց նախարարութենէն աղբիւր մը՝ հակադարձելով այս սպառնական յայտարարութեանց, յայտնեց, որ Սուրիա իր ժողովուրդին դէմ որեւէ պայմանի տակ պիտի չօգտագործէ քիմիական զէնք, «եթէ նման զէնքեր գոյութիւն ունին Սուրիոյ մէջ»: Ան նշած է, որ Սուրիա իր ժողովուրդը կը պաշտպանէ եւ կը պայքարի «Քայիտա»ի հետ կապ ունեցող ահաբեկչութեան դէմ, որ «ծանօթ երկիրներու, նախ եւ առաջ Միացեալ Նահանգներու զօրակցութիւնը կը վայելէ»:
Յայտնենք, թէ Սուրիոյ պետական լրատուական աղբիւրները հաղորդեցին, թէ Երեքշաբթի օր Դամասկոսի արուարձաններէն մէկուն մէջ գտնուող դպրոցի մը վրայ ընդդիմադիր զինեալներու կողմէ արձակուած հրթիռի մը պայթումը առնուազն 29 զոհ խլած է:
Միւս կողմէ, Արաբական լիկայի ընդհանուր քարտուղար Նապիլ Արապի շեշտեց, որ սուրիական վարչակարգը «որեւէ պահու կրնայ տապալիլ» նշելով, որ «ճակատամարտը ներկայիս Դամասկոսի մէջ է եւ յստակ է, որ սուրիական ընդդիմութիւնը քաղաքական եւ զինուորական գետնի վրայ յառաջխաղացքի մէջ է»:
Միւս կողմէ, «Սի.Էն.Էն. Թիւրք» հաղորդեց, որ թուրք-սուրիական Պապ Հաուա սահմանային անցքի կէտին մօտակայքը դարձեալ Սուրիոյ տարածքէն արձակուած հինգէ աւելի հրթիռներ ինկած են, բաց տարածքներու մէջ: Անոնք մարդկային կամ նիւթական վնասներ չեն պատճառած:

 

LEAVE A REPLY

Please enter your comment!
Please enter your name here