Ատամ Շիֆ Արցախի ԱԳ Նախարարին Պատմած Է ԼՂՀ-ի Համար ԱՄՆ Աջակցութեան Ծաւալի Աւելացման Ուղղուած Իր Ջանքերուն Մասին

0
122

  ԱՄՆ Ներկայացուցիչներու պալատի անդամ Ատամ Շիֆ  Ուաշինկթընի մէջ  հանդիպած  է  ԼՂՀ արտաքին գործոց նախարար Կարէն Միրզոյանի հետ: Հանդիպման ժամանակ զրուցակիցները քննարկած են իրավիճակը Հարաւային Կովկասի, ինչպէս նաեւ նշած են ԱՄՆ յետագայ մասնակցութեան անհրաժեշտութիւնը Լեռնային Ղարաբաղի զարգացման համար: Կարէն Միրզոյեան շնորհակալութիւն յայտնած է գոնկրէսական Շիֆին անոր ջանքերուն համար, որոնք ուղղուած են Արցախին ամերիկեան մարդասիրական օգնութեան ծաւալներու աւելացման: Այս մասին կը հաղորդէ  panarmenian.net-ը:

«Ես ներկայացուցի Կարէն Միրզոյեանին Ղարաբաղին յատկացուող օգնութիւնը 2 միլիոն տոլարէն մինչեւ 5 միլիոն տոլար հասցնելու իմ աշխատանքիս մասին»,-յայտարարած է Ատամ Շիֆ: «Մենք նաեւ քննարկեցինք Ռամիլ Սաֆարովի արտայանձնման եւ ներման հետ կապուած հարցեր, ինչպէս նաեւ այդ միջադէպի ազդեցութիւնը ղարաբաղեան հակամարտութեան խաղաղ կարգաւորման վրայ»,-ըսած է Շիֆ:

Նախապէս Ներկայացուցիչներու պալատի անդամ Ատամ Շիֆ ԱՄՆ Ներկայացուցիչներու պալատի եւ Ծերակոյտի պետական եւ միջազգային յատկացումներու հարցերով ենթակոմիտէներու նախագահներուն եւ բարձրաստիճան անդամներուն նամակ յղած էր` կոչ ընելով նուազեցնել Ատրպէճյանին տրամադրուող ռազմական օգնութիւնը:

Նման կոչին պատճառը հայ սպայ Գուրգէն Մարգարեանը կացինահարած մարդասպան Ռամիլ Սաֆարովին ներում շնորհելն ու հերոսացնելն է:

«Ատրպէյճան իրականացուցած է արդարութեան դէմ ամենասարսափելի յանցագործութիւնը` սառնասիրտ յանցագործին հերոս դարձնելով: Ակնյայտ է, որ այն միջոցները, որոնք մենք կը տրամադրէինք Ատրպէյճանին, օգտագործուած են շատ աւելի վատ նպատակներով, քան եթէ այդ միջոցները առհասարակ չօգտագործուէին: ԱՄՆ-ն պէտք չէ հանդուրժէ Հայաստանի կամ Ղարաբաղի նկատմամբ բռնութեան գործողութիւնները, իսկ նախագահ Ալիեւի նմանատիպ գործողութիւնները կը խաթարեն տարածաշրջանի մէջ խաղաղութիւն հաստատելու միջազգային ջանքերը»,- ըսուած է Ատամ Շիֆի նամակին մէջ:

Ըստ անոր՝ Ալիեւի կառավարութեան կողմէ Սաֆարովի համար կազմակերպած ընդունելութիւնը օրէնքի գերակայութեան նկատմամբ արհամարհանքի դրսեւորում է: Իսկ օրէնքի գերակայութիւնը դէպի Եւրոատլանտիկ հանրութիւն ձգտող իւրաքանչիւր պետութեան հիմնական սկզբունքն է:

«Ատրպէյճանը պէտք է բարձր գին վճարէ իր գործողութիւններուն համար: Պաքուն ԱՄՆ-էն ֆինանսական օգնութիւն կը ստանայ ոչ թէ անոր համար, որ գումարի կարիք ունի, այլ անոր, որ ատիկա կը հանդիսանայ երկու պետութիւններու մտերմութեան իւրայատուկ վկայութիւն:

 

 

LEAVE A REPLY

Please enter your comment!
Please enter your name here