Թրիփոլիի Բախումները Վեց Զոհ Կը Խլեն

0
122

Թրիփոլիի մէջ զինեալ բախումներն ու արձակազինութիւնը շարունակուեցան Չորեքշաբթի, Դեկտեմբեր 5-ին՝ զոհերուն թիւը հասցնելով վեցի: Վիրաւորուած են տասնեակներով ուրիշներ: Ժապալ Մըհսեն եւ Պապ Թըպպանէ շրջաններուն մէջ բախումները զսպելու լիբանանեան բանակի ջանքերը կը շարունակուին:

 Բանակի հրամանատարութիւնը հրապարակեց հաղորդագրութիւն մը, որուն մէջ կոչ կ՛ըլլայ քաղաքացիներուն՝ հետեւելու բանակի որդեգրած ապահովական միջոցառումներուն, երաշխաւորելու համար քաղաքացիներուն ապահովութիւնը: Հոն նաեւ զգուշացումներ կը տրուին զինեալներուն, թէ անոնց դէմ կրակ պիտի բացուի, եթէ շարունակեն խախտել շրջանի կայունութիւնը:
Միւս կողմէ, Լիբանանի մօտ Սուրիոյ դեսպան Ալի Ապտըլ Քերիմ Ալի Չորեքշաբթի օր Լիբանանի արտաքին գործոց նախարար Ատնան Մանսուրին յայտնեց, որ Սուրիոյ իշխանութիւնները հաւանութիւն յայտնած են Թալքալախի մէջ սպաննուած 21 լիբանանցի զինեալներուն դիակները Լիբանանի յանձնելու պահանջին: Զինեալները, Սուրիոյ ընդդիմադիրներուն միանալու նպատակով՝ Սուրիա մուտք գործած էին:

Լիբանանի կառավարութեան Երեքշաբթի օրուան նիստին ընթացքին, վարչապետ Նեժիպ Միքաթի վերահաստատեց Սուրիոյ տագնապին նկատմամբ չէզոք կեցուածք որդեգրելու անհրաժեշտութիւնը: Ան կոչ ուղղեց բոլորին հեռու մնալու Սուրիոյ ներքին հարցերուն միջամտելէ:
Սուրիացի ընդդիմադիրներուն զէնք տրամադրելու յանցանքով ամբաստանուող երեսփոխան Օքապ Սաքըրի վերաբերող թղթածրարի քննարկման ընթացքին, մեծ թիւով նախարարներ խստօրէն դատապարտեցին Սաքըրի կեցուածքն ու քայլերը՝ շեշտելով Սաքըրի անձեռնմխելիութիւնը ջնջելու կարեւորութիւնը:
Իր կարգին, Փոփոխութիւն եւ բարեկարգում համախմբումի նախագահ, երեսփոխան զօր. Միշել Աուն համախմբումի մէկ նիստէն ետք տրուած մամլոյ ասուլիսի մը ընթացքին յայտնեց, որ պետութիւնը եւ դատական իշխանութիւնները պէտք է դիմեն համապատասխան քայլերու՝ Սուրիոյ պատերազմին մեղսակիցները պատժելու նպատակով: Աուն աւելցուց, որ նախկին վարչապետ Սաատ Հարիրիի «Մուսթաքպալ» հոսանքը դարձած է Սուրիոյ մէջ տագնապը հրահրող միջազգային շարժումին նպաստող կողմ մը:

 

LEAVE A REPLY

Please enter your comment!
Please enter your name here