Վարչապետ Տիգրան Սարգսեան Աշխատանքային Այցով Կը Մեկնի Գերմանիա եւ ԱՄՆ

0
132
 
ՀՀ վարչապետ Տիգրան Սարգսեան Դեկտեմբերի 6-14 աշխատանքային այցով կը մեկնի Գերմանիոյ Դաշնային Հանրապետութիւն եւ Ամերիկայի Միացեալ Նահանգներ:

Այս մասին կը հաղորդէ ՀՀ կառավարութեան տեղեկատուութեան եւ հասարակայնութեան հետ կապերու վարչութիւնը: Դեկտեմբեր 6-ին ՀՀ վարչապետի գլխաւորած կառավարական պատուիրակութիւնը երկօրեայ այցով կը մեկնի Գերմանիայի Դաշնային Հանրապետութեան Ֆրանքֆուրթ քաղաք, ուր պիտի մասնակցի Commerzbank-ի կեդրոնակայանին մէջ կայանալիք գործարար համաժողովին եւ հանդիպում պիտի ունենայ Commerzbank-ի ղեկավարութեան հետ:

Գերմանիա այցի ծիրէն ներս կը նախատեսուի ՀՀ վարչապետին հանդիպումը երկրամասի ղեկավարութեան եւ գերմանական առաջատար ընկերութիւններու ներկայացուցիչներու, ինչպէս նաեւ Ֆրանքֆուրթի հայ համայնքի հետ: Կառավարութեան ղեկավարը պիտի մասնակցի նաեւ Gutenberg թանգարանին մէջ կազմակերպուող, հայ գրատպութեան 500-ամեակին նուիրուած ցուցահանդէսին:

Դեկտեմբեր 8-ին Տիգրան Սարգսեանի գլխաւորած պատուիրակութիւնը Ֆրանքֆուրթէն պիտի մեկնի ԱՄՆ Քալիֆորնիոյ նահանգ: Եռօրեայ աշխատանքային այցին առաջին օրը ՀՀ կառավարութեան ղեկավարը պիտի այցելէ Քալտէք համալսարան, հանդիպում պիտի ունենայ համալսարանի ղեկավարութեան հետ, ինչպէս նաեւ Քալիֆորնիոյ հայ գիտնականներու հետ: Հանդիպումի ընթացհին ներկայ պիտի ըլլայ նաեւ ԱՄՆ քոնկրէսական Ատամ Շիֆը:

Դեկտեմբեր 9-ին վարչապետ Սարգսեան պիտի այցելէ Կեթթի թանգարան` 14-րդ դարու Վերածնունդի դարաշրջանի Ֆլորենցիոյ գեղանկարչութեան ցուցադրութիւնը դիտելու եւ Կեթթի պահոց` Զէյթունի աւետարանի 8 էջերուն ծանօթանալու նպատակով: Այնուհետեւ Տիգրան Սարգսեան պիտի մեկնի Պըրպանք` Հայ Առաքելական Եկեղեցու Արեւմտեան ԱՄՆ առաջնորդարան, ուր պիտի հանդիպի Հարաւային Քալիֆորնիոյ հայ համայնքի ներկայացուցիչներուն հետ:

Այցի երրորդ օրը ՀՀ վարչապետը Սթանֆորթ համալսարանին մէջ պիտի մասնակցի «ArmTech Congress»-ի լիագումար նիստին եւ հանդէս պիտի գայ ելոյթով: Կառավարութեան ղեկավարը պիտի այցելէ «Plug and Play» համակարգչային ընկերութիւններու արտադրամաս, ու ներկայ պիտի գտնուի Հայաստանի ՏՏ ներկայացուցչական կեդրոնի բացման հանդիսաւոր արարողութեան եւ Հայաստանի մէջ վենչուրային հիմնադրամի ստեղծման մասին յուշագրի ստորագրման: Կը նախատեսուի նաեւ Intel ընկերութեան կողմէ Հայաստանի մէջ գիտահետազօտական կեդրոն հիմնելու մասին փոխ¬ըմբռնման յուշագրի ստորագրում, Տիգրան Սարգսեանի այցը IBM ընկերութեան Ալմատեն հետազօտական կեդրոն եւ հանդիպում IBM-ի ղեկավարութեան հետ:

Դեկտեմբեր 11-ին ՀՀ կառավարութեան ղեկավարը պիտի մեկնի Պոսթըն, ուր կը նախատեսուի ՀՀ վարչապետի մասնակցութիւնը Հարվըրտ համալսարանի Պելֆըր կեդրոնին մէջ կայանալիք սեմինարին: Տիգրան Սարգսեան պիտի այցելէ նաեւ Մասաչուսէթսի ճարտարագիտական ինստիտուտ, պիտի հանդիպի տեղի հայ ուսանողներու եւ հայ համայնքի ներկայացուցիչներու հետ:

Դեկտեմբեր 14-ին ՀՀ վարչապետի գլխաւորած կառավարական պատուիրակութիւնը պիտի վերադառնայ Երեւան:

Կառավարական պատուիրակութեան կազմին մէջ են ՀՀ կառավարութեան աշխատակազմի ղեկավար Դաւիթ Սարգսեան, ՀՀ տնտեսութեան նախարար Տիգրան Դաւթեան, ՀՀ փոխադրամիջոցներու եւ կապի նախարար Գագիկ Պեգլարեան, ՀՀ մշակոյթի նախարար Յասմիկ Պօղոսեան, ՀՀ տնտեսութեան նախարարի առաջին տեղակալ Կարինէ Մինասեան, պաշտօնատար այլ անձիք:

LEAVE A REPLY

Please enter your comment!
Please enter your name here