Եգիպտական Բանակը Կը Միջամտէ՝ Զսպելու Համար Բախումները

0
126

Եգիպտոսի բանակը Հինգշաբթի, Դեկտեմբեր 6-ին հրասայլերով եւ զրահապատ փոխադրակառքերով  կը միջամտէ, զսպելու՝ Չորեքշաբթի օր  նախագահ Մոհամմատ Մորսիի ընդդիմադիրներուն եւ անոր համակիրներուն միջեւ սկսած բախումները: Մագլցումը սկսաւ այն պահուն,  երբ Մորսիի համակիր իսլամիստներ յարձակեցան նախագահական պալատին առջեւ նստացոյց կատարող ընդդիմադիրներուն վրայ:
Բախումներուն ընթացքին սպաննուեցաւ առնուազն 7  քաղաքացի եւ վիրաւորուեցան 800  ուրիշներ:
Եգիպտոսի նախագահական պահակագունդի հրամանատարը յայտարարեց, թէ պալատին առջեւ բանակային ուժերու տեղակայման նպատակը Մորսիի համակիրներն ու ընդդիմադիրները իրարմէ անջատելն է՝ վստահեցնելով, որ բանակը «ցուցարարները ճնշելու գործիք պիտի չըլլայ»:
Մորսիի համակիր Իսլամ եղբայրներու քաղաքական թեւի՝ Ազատութիւն եւ Արդարութիւն կուսակցութեան փոխնախագահը՝ նախագահ Մորսիի խորհրդական Ռաֆիք Հապիպ, Հինգշաբթի օր հրաժարեցաւ այս պաշտօններէն, իբրեւ բողոք նախագահական պալատին առջեւ տեղի ունեցած բախումներուն դէմ: Այս որոշումով, նախագահի լիազօրութիւնները ընդարձակելու Մորսիի որոշումէն եւ անոր դէմ յառաջացած բողոքի ալիքէն ետք իրենց պաշտօնէն հրաժարած նախագահական խորհրդականներուն թիւը բարձրացաւ վեցի:
 Երէկ Հինգշաբթի,  հեռատեսիլէն սփռուած  հաղորդումի մը  ընթացքին, նախագահ  Մորսի յայտնեց, թէ  պիտի չհրաժարի  իր առաջադրած  սահմանադրութենէն: Ան միաժամանակ երկխօսութեան հրաւիրեց  ընդդիմութիւնը: Եգիպտոսի փոխնախագահ Մահմուտ Մեքքի  հաստատեց , թէ վիճելի նկատուող սահմանադրական նախագիծին շուրջ հանրաքուէն տեղի պիտի ունենայ ճշդուած թուականին՝ Դեկտեմբեր 15ին, հակառակ հետզհետէ աճող բողոքի ցոյցերուն:

 

LEAVE A REPLY

Please enter your comment!
Please enter your name here