Սուրիա Կը Դատապարտէ Թուրքիոյ Մէջ «Փեթրիոթ»ներ Տեղադրելու Որոշումը

0
141

 Սուրիոյ արտաքին գործոց փոխնախարար Ֆայսալ Մըքտատ  խստօրէն դատապարտեց Թուրքիոյ մէջ «Փեթրիոթ» տիպի հրթիռներ տեղադրելու ՆԱԹՕ-ի որոշումը՝ զայն «հրահրի»չ քայլ մը համարելով, մինչ Գերմանիոյ կառավարութիւնը կ՛որոշէր հարկաւոր «Փեթրոըթ»ները Թուրքիա ուղարկել:
Մըքտատ աւելցուց, թէ Սուրիոյ կողմէ քիմիական զէնքերու գործածութեան մասին վերջին քանի մը օրերուն կատարուող յայտարարութիւններուն նպատակն է Սուրիոյ մէջ զինուորական միջամտութեան մը համար արդարացում գտնել, որուն առաջին քայլը կրնայ ըլլալ նշեալ հրթիռներուն տեղադրումը:
Միացեալ Նահանգներու պետական քարտուղար Հիլարի Գլինթըն, անդրադառնալով Թուրքիոյ մէջ «Փեթրոըթ»ներու տեղակայման հարցին՝ նշեց, որ անոնք պատգամ մըն են Սուրիոյ: Ան ապա կրկնեց. «Մտահոգ ենք, որ սուրիական վարչակարգը յուսահատութեան հասնի եւ քիմիական զէնքերը օգտագործէ»:
Յայտնենք, թէ հրթիռներու համակարգը նաւերով Թուրքիա պիտի փոխադրուին: Անոնց փոխադրութիւնն ու տեղադրումը «քանի մը շաբաթ» կրնայ տեւել՝ ըստ ՆԱԹՕ-ի աղբիւրներուն:
Միւս կողմէ, «Նիւ Եորք Թայմզ» հաղորդեց, որ Թուրքիոյ եւ Ռուսիոյ ղեկավարներու Պոլսոյ մէջ հանդիպման ընթացքին որոշուած է, որ Մոսկուա փորձէ Սուրիոյ նախագահ Պաշշար Ասատը համոզել՝ հեռանալու իշխանութենէն: Այս լուրը թուրք բարձրաստիճան պաշտօնատար մը օրաթերթին փոխանցած է:Այսուհանդերձ այս տեղեկութիւնները կը կարօտին հաստատման:
Նաեւ, «Թայմզ» հաղորդեց, որ Միացեալ Նահանգներ եւ անոր դաշնակիցները պատրաստ են Սուրիոյ դէմ յարձակելու, եթէ սուրիական վարչակարգին կողմէ քիմիական զէնքեր օգտագործուին: Իսրայէլեան «Մաարիֆ» օրաթերթը իր կարգին նշեց, որ Իսրայէլ կրնայ մասնակցիլ Սուրիոյ դէմ հաւանական գործողութեան մը, «եթէ Պաշշար Ասատի վարչակարգը քիմիական զէնքեր օգտագործէ»: Օրաթերթը կը նշէ, որ Ուաշինկթըն եւ Լոնտոն պատրաստած են Սուրիոյ դէմ՝ Յորդանանի, Թուրքիոյ եւ Իսրայէլի մասնակցութեամբ ցամաքային յարձակումի ծրագիր մը, որուն պիտի մասնակցի շուրջ 75 հազար զինուոր:

 

LEAVE A REPLY

Please enter your comment!
Please enter your name here