ԼՂՀ Պետական Անկախութեան Հանրաքուէի եւ Սահմանադրութեան Օրուան Առիթով Բակօ Սահակեան Շնորհաւորական Ուղերձ Յղած է

0
100

Արցախի Հանրապետութեան նախագահ Բակօ Սահակեան շնորհաւորական ուղերձ յղած է ԼՂՀ պետական անկախութեան մասին հանրաքուէի եւ Սահմանադրութեան օրուան առիթով: Այս մասին կը յայտնեն ԼՂՀ նախագահի աշխատակազմի տեղեկատւութեան գլխաւոր վարչութենէն:

Ուղերձին մէջ նշուած է.

Սիրելի հայրենակիցներ,
Արցախի իշխանութիւններու եւ անձամբ իմ անունով ի սրտէ կը շնորհաւորեմ ձեզ ԼՂՀ պետական անկախութեան մասին հանրաքուէի եւ Սահմանադրութեան օրուան առիթով:

10 Դեկտեմբեր 1991-ի հանրաքուէն պատմական իրադարձութիւն էր արցախցիներու կեանքին մէջ, որ կանխանշեց մեր երկրի յետագայ զարգացման ուղին:

15 տարի ետք` 2006-ի նոյն օրը, կրկին համաժողովրդական հանրաքուէի միջոցով մենք ընդունեցինք պետութեան ու հասարակութեան հիմնական օրէնքը` Լեռնային Ղարաբաղի Հանրապետութեան Սահմանադրութիւնը: Ատով իսկ մեր ժողովուրդը կրկին վերահաստատեց իր հաւատարմութիւնը ժողովրդավարութեան հիմնարար սկզբունքներուն եւ համամարդկային արժէքներուն` մէկ անգամ եւս ապացուցելով, որ իր ընտրած ուղին անսասան է ու ճիշդ, ընթացքը` անկասելի ու հաստատուն:

Մեր նպատակն է իրականացնել մեր նախնիներու դարաւոր երազանքը` ունենալ ուժեղ, զարգացած ու հզօր հայրենիք, ապահովել ժողովուրդի բարեկեցիկ կեանքը, սերունդներու համար կերտել պայծառ ու լուսաւոր ապագայ: Եւ ես վստահ եմ, որ մենք պիտի կրնանք կեանքի կոչել մեր համազգային նպատակները` կեանքի կոչել միասնաբար ու համախմբուած, ուս ուսի յաղթահարելով բոլոր դժուարութիւնները եւ քայլ առ քայլ մօտենալով մեր վերջնական յաղթանակին:

Մէկ անգամ եւս կը շնորհաւորեմ բոլորս այս պետական կարեւոր տօնին առիթով եւ կը մաղթեմ նորանոր յաջողութիւններ ու ձեռքբերումներ` Արցախի անկախ պետականութեան զօրացման անշեղ ճանապարհին:

LEAVE A REPLY

Please enter your comment!
Please enter your name here