Հայաստանը Բաւական Ներուժ Ունի Դառնալու Կովկասի Սիլիգոնեան Հովիտը. Ատըմ Շիֆ

0
103

 ՀՀ վարչապետ Տիգրան Սարգսեան աշխատանքային այցով մեկնած է Ամերիկայի Միացեալ Նահանգներ: Այս մասին կը յայտնեն ՀՀ կառավարութեան հասարակայնութեան հետ կապերու եւ լրատւութեան վարչութենէն:

Աշխատանքային այցի առաջին օրը կառավարութեան ղեկավարը այցելած է Գալիֆորնիոյ Ճարտարագիտական համալսարան, ուր հանդիպած է համալսարանի նախագահ ժան Լու Շամոյի հետ: Հանդիպան ժամանակ վարչապետը ներկայացուցած է Հայաստանի Հանրապետութեան կրթութեան ոլորտին մէջ իրականացուող բարեփոխումները, կրթութեան որակի բարելաւման, հայաստանեան համալսարաններու միջազգային հաւատարմագրման առկայ գործընթացները: Քննարկուած են երկկողմ համագործակցութեան հեռանկարները, անդրադարձած` Հայաստանի մէջ տեղեկատուական ճարտարագիտութեան ոլորտի զարգացման ու այն ներուժին, որ տարուէ տարի ոլորտը պիտի ապահովէ աճով:

Հանդիպման ներկայ Միացեալ Նահանգներու Գոնկրէսի Ներկայացուցիչներու պալատի անդամ Ատըմ Շիֆ կարծիք յայտնած է, որ Հայաստանը ունի բաւական ներուժ դառնալու Կովկասի Սիլիգոնեան hովիտը:

Այնուհետեւ Տիգրան Սարգսեան հանդիպած է գալիֆորնիոյ Ճարտարագիտական hամալսարանի հայ շրջանաւարտներուն, ուսանողներուն եւ ամերիկաբնակ հայ գիտնականներու: Կառավարութեան ղեկավարը պատասխանած է անոնց հետաքրքրող բազմաթիւ հարցերու: Անդրադարձ եղած է բնական եւ ճշգրիտ գիտութիւններու ոլորտներուն մէջ առկայ իրավիճակին եւ զարգացման հեռանկարներուն: Քննարկուած են հայագիտութեան, աստղագիտութեան, բնագիտութեան եւ ուսողութեան, հանրակրթական մանկավարժութեան վերաբերող հարցեր:

Տիգրան Սարգսեան ներկաներուն շնորհակալութիւն յայտնած է հետաքրքրական հանդիպման համար եւ յորդորած է ամրապնդել կապերը հայրենիքի հետ, նպաստել Հայաստանի մէջ գիտութեան զարգացման:

Վարչապետի աշխատանքային այցը ԱՄՆ-ի մէջ պիտի շարունակուի մինչ Դեկտեմբեր 12:

 

LEAVE A REPLY

Please enter your comment!
Please enter your name here