Ամերիկեան Մեծ Ընկերութիւնները Օպամային Կը Դիմեն՝ Հայաստանի Հետ Տնտեսական Կապերը Սերտացնելու Կոչով

0
134

 Հայաստանի մէջ գործունէութիւն ծաւալող ամերիկեան շարք մը մեծ ընկերութիւններ, ներառեալ՝ «Մայքրոսոֆթ» (Microsoft), «ՖետԷքս» (FedEx), եւ «Նեզտեք» (NASDAQ), Հայաստանի մօտ ամերիկեան դեսպանատան միջոցաւ նամակներ յղած են Միացեալ Նահանգներու նախագահ Պարաք Օպամայի վարչակարգին՝ կոչ ընելով անոր, որ կտրուկ քայլեր որդեգրուին հայ-ամերիկեան տնտեսական եւ առեւտրական յարաբերութիւնները սերտացնելու նպատակով:
Հայաստանի եւ Միացեալ Նահանգներու մէջ նոր աշխատատեղիներ ստեղծելու նպատակով, Ամերիկայի Հայ Դատի յանձնախումը եւս այս կապերը սերտացնելու միտումով մօտէն կը համագործակցի Սպիտակ տան, Միացեալ Նահանգներու իշխանութեանց առեւտրական հարցերու պաշտօնական ներկայացուցչութեան, Քոնկրեսին, ինչպէս նաեւ արտաքին գործոց, ելեւմուտքի, առեւտուրի նախարարութեանց հետ:
Վերոյիշեալ ընկերութիւնները նաեւ կոչ ըրած են Միացեալ Նահանգներու իշխանութեանց, որ
Հայաստանի հետ երկկողմանի բանակցութիւններ սկսին, Առեւտուրի եւ ներդրումներու համաձայնագիրը (TIFA) վերջնականացնելու համար:
Նշեալ ամերիկեան ընկերութիւնները հազարաւոր պաշտօնեաներ ունին Հայաստանի եւ աշխարհի տարածքին՝ տասնեակ միլիոն տոլարներու հասնող եկամուտ գոյացնելով, միաժամանակ նպաստելով երկու երկիրներու միջեւ համագործակցութեան սերտացման:
Վերոյիշեալներու կողքին, այս դիմումին իրենց ձայնը միացուցած են նաեւ «Մերիաթ», «Ամերիա» դրամատնային խմբակը, «Փրուտընս» իրաւաբանական խորհրդատուական հիմնարկը, «Կրենթ Թորնթըն», «Պէյքըր Թիլի», «Սինըրճի», «Մերկերեան Քարփեթ», «Նեշընըլ Ինվեսթմընց», «Մենթըր Կրեֆիքս», «Ֆըրսթ Մորթկէյճ», «Ճիօթիմ», «Հայլինք», «Էլ.Սի. Տիսթրիպիուշըն» եւ «Լինքակարտ Սիսթըմզ»:
Հայաստանի իշխանութիւնները տարիներէ ի վեր կը դիմեն Ուաշինկթընի իշխանութեանց, որպէսզի երկկողմանի առեւտուրը բարելաւելու նպատակով քայլեր որդեգրուին եւ կրկնակի տուրքերու դրութիւնը վերցուի: Քոնկրեսի շարք մը անդամներ եւս կոչ ըրած են Հայաստանի հետ Առեւտուրի եւ ներդրումներու համաձայնագիրի բանակցութիւնները սկսելու:
Միացեալ Նահանգներու նախագահը իր 2008-ի նախընտրական քարոզարշաւի ընթացքին խոստացած էր աջակցիլ Հայաստանի հետ առեւտրական յարաբերութիւններու ընդարձակման, իսկ Հայաստանի մօտ Ամերիկայի դեսպան Ճան Հեֆըրն, իր պաշտօնին վաւերացումը ապահովելու հարցաքննութեանց ընթացքին յայտնած էր, որ կը փափաքի Ամերիկա-Հայաստան առեւտրական յարաբերութիւնները սերտացնել:
Հայաստանի մէջ Ամերիկեան առեւտուրի գրասենեակը, իր ատենապետ Էտուարտ Մուրատեանի ու գործադիր վարիչ Տիանա Ղազինեանի ջանքերով, արդէն իսկ յատկանշական աշխատանք տարած է Հայաստանի մէջ ամերիկացի գործարար շրջանակներուն նեցուկ կանգնելու գործին մէջ:
Նախագահին ուղղուած նամակին օրինակները յանձնուած են Լոս Անճելըս այցելող դեսպան Հեֆըրնին:
Նամակին մէջ մասնաւորապէս շեշտուած են հետեւեալ կէտերը.
– Ներդրումներու մթնոլորտը բարելաւել՝ նկատի ունենալով յատկապէս Հայաստանի դիմագրաւած դժուարութիւնները՝ Ատրպէյճանի ու Թուրքիոյ պարտադրած տնտեսական շրջափակման պատճառով, միաժամանակ մատնանշել այն մարզերը, ուր յարաբերութեանց սերտացումը աւելի նպաստաւոր պիտի ըլլան կողմերուն:
– Մաքսային դրութիւնը բարելաւել՝ միաժամանակ ներդրումի եւ արտածումի առնչուող պետական օրէնքները աւելի թափանցիկ դարձնել:
– Ներկայիս Հայաստանի մէջ իրականացուող ամերիկեան շարք մը նախաձեռնութիւններ աւելի ազդու դարձնելու կարելիութիւնները քննել:
– Հողագործութեան մարզին մէջ ներդրումներու աճ եւ գործակցութեան սերտացում ապահովել:
– Դրամատնային, ապահովագրական ու զբօսաշրջային կապերը սերտացնել:
– Սփիւռքէն յաւելեալ ներդրումներ ու առեւտուրը քաջալերելու նպատակով քայլեր որդեգրել:
– Արուեստի գործերու ոչ օրինական տարբերակններու տարածումը զսպելու եւ արուեստագէտներու իրաւունքները ապահովելու նպատակով հարկաւոր քայլերու դիմել:

LEAVE A REPLY

Please enter your comment!
Please enter your name here