ՀՀ Քաղաքական Ուժերը Յստակացուցած են Համագումարներու Թուականներն ու Օրակարգերը

0
155

 Հայաստանի մէջ 18 Փետրուար 2013-ին կայանալիք նախագահական ընտրութիւններէն առաջ քաղաքական ուժերը կը յստակեցնեն դիրքորոշումներն ու գործնական քայլերը: Ընտրութիւններուն իրենց մասնակցութեան ձեւաչափի եւ այլ հարցերու ճշգրտման նպատակով` որոշ կուսակցութիւններ կը նախատեսեն համագումարներ: Այս մասին կը տեղեկացնէ Armenpress.am-ը: 

Հայաստանի հանրապետական կուսակցութեան անդամ Յովհաննէս Սահակեան նշած է, որ Դեկտեմբեր 15-ին քաղաքական ուժի 14-րդ` արտահերթ համգումարի օրակարգային հարցերը յստակ են, նախապատրաստական աշխատանքները` բուռն ընթացքի մէջ. օրակարգի գլխաւոր թեման նախագահական ընտրութիւններուն գործող նախագահ Սերժ Սարգսեանի առաջադրումն է: 

«Բարգաւաճ Հայաստան» կուսակցութիւնը դեռ չի բարձրաձայներ համագումարի իրականացման նպատակին մասին: ԲՀԿ մամլոյ խօսնակ Տիգրան Ուրիխանեան նշած է, որ ներկայ դրութեամբ իրենք որեւէ ձեռնարկ չեն նախատեսած եւ ժամկէտներ չեն կրնար նշել: Ան խոստացած է հանրութեան տեղեկացնել իրենց իւրաքանչիւր որոշման մասին, որ կրնայ կայացուիլ նաեւ քաղաքական խորհուրդի նիստին:

ՀՅ Դաշնակցութիւնը դեռ չէ ճշտած համագումարի իրականացման օրը, սակայն կուսակցութեան անդամ Արծուիկ Մինասեանի խօսքով` ամենայն հաւանականութեամբ անիկա տեղի ունենայ մինչեւ Դեկտեմբեր 25-26, օրակարգի վրայ ունենալով նախագահական ընտրութիւններու թեման: 

«Ժառանգութիւն» կուսակցութեան համագումարը Դեկտեմբեր 22-ին է: «Ժառանգութեան» անդամ Ռուբիկ Յակոբեան տեղեկացուցած է, որ օրակարգի վրայ նախագահական ընտրութիւններուն կուսակցութեան դիրքորոշման յստակեցման հարցն է: Քաղաքական այս ուժի ղեկավար Ռաֆֆի Յովհաննիսեան արդէն իսկ յայտարարած է թեկնածութեան առաջադրման մտադրութեան մասին:

 «Ազատ դեմոկրատներ» կուսակցութեան անդամ Ալիկ Արզումանեան նշած է, որ դեռ որոշուած չէ համագումարի իրականացման ժամկէտը եւ օրակարգը, սակայն համագումարի իրականացումը կանոնադրութեամբ հաստատուած է: 

«Օրինաց երկիր» կուսակցութեան մամուլի քարտուղար Արթուր Միսակեան յայտնած է, որ ՕԵԿ համագումարը պիտի կայանայ Դեկտեմբեր 22-ին: Օրակարգը բաւական հարուստ է` յառաջիկայ նախագահական ընտրութիւններ, քաղաքական խորհուրդի ընտրութիւն, փոփոխութիւններ կանոնադրութեան մէջ, կազմակերպչական հարցեր: 

Հայոց Համազգային Շարժումը համագումարը պիտի իրականացնէ Դեկտեմբեր 22-ին: Կուսակցութենէն տեղեկացուցած են, որ համագումարի օրակարգին վրայ ընդգրկուած է վարչութեան հաշուետւութիւնը, քաղաքական վերլուծութիւն, վարչութեան նոր ընտրութիւններ, նախագահական ընտրութիւններուն մասնակցութեան ձեւաչափը:

 Կուսակցութիւնները համագումարները կը հրաւիրեն մինչեւ նախագահական ընտրութիւններուն մէջ թեկնածուներու յառաջադրման սկզբնաժամկէտը` Դեկտեմբեր 25, որպէսզի հասցնեն անհրաժեշտ փաստաթուղթերը ներկայացնել Կեդրոնական ընտրական յանձնաժողով: Թեկնածուներու արձանագրութիւնը տեղի պիտի ունենայ Յունուար 4-14: Նախընտրական քարոզչութիւնը պիտի մեկնարկէ Յունուար 21-ին, պիտի աւարտի Փետրուար 16-ին: Ինքնաբացարկի դիմումներ ներկայացնելու վերջնաժամկէտը Փետրուար 8-ի 18:00-ն է: Ելեկտրոնային եղանակով քուէարկութիւնը պիտի սկսի Երեւանի ժամանակով` Փետրուար 9-ի 08:00-ին, պիտի աւարտի Փետրուար 13-ին` ժամը 20:00-ին: Քուէարկութիւնը պիտի սկսի Փետրուար 18-ին` 08:00-ին եւ պիտի աւարտի  20:00: 2013-ին Հայաստանի մէջ կայանալիք նախագահական ընտրութիւններու արդիւնքներուն ամփոփումը պիտի ըլլայ 25 Փետրուար 2013-ին:

LEAVE A REPLY

Please enter your comment!
Please enter your name here