Պաքու Մտահոգ՝ Կապալայի Ռատարի Կայանէն Հրաժարելու Ռուսիոյ Քայլէն

0
176

 Ատրպէյճանի արտաքին գործոց նախարարութիւնը հաղորդեց, թէ Ռուսիայէն ստացած է նամակ մը, ուր կը փոխանցուի, թէ Մոսկուա որոշած է հրաժարիլ Կապալայի ռատարի կայանի օգտագործումէն:
Կայանին վարձակալումը երկարաձգելու նպատակով, մօտաւորապէս մէկ տարիէ ի վեր, երկու երկիրներուն միջեւ տեղի կ՛ունենան բանակցութիւններ, որոնք ձախողեցան փաստօրէն, որովհետեւ Պաքու որոշեց անհամեմատօրէն շատ աւելի բարձր վարձ գանձել Մոսկուայէն, քան այն, ինչ ցարդ կը գանձէր:
Արդարեւ, մինչ Պաքու նախապէս տարեկան 7 միլիոն տոլար կը գանձէր, Ատրպէյճանի իշխանութիւնները նոր համաձայնագիրիին համար կը պահանջեն տարեկան 300 միլիոն տոլար:
Կայանին մէջ հաստատուած էին մօտաւորապէս 1000 ռուս զինուորներ՝ 500 ատրպէյճանցիներու կողքին:
Ռուսիոյ որոշումը անհանգստացուցած ըլլալ կը թուի Պաքուն, որովհետեւ խորհրդարանի ղեկավարութենէն եւ կառավարական ու նախագահական շրջանակներէ շարք մը պաշտօնատարներ Երեքշաբթի օր յայտարարութիւններ կատարեցին՝ պնդելով, թէ Մոսկուայի որոշումը պատճառ պիտի չդառնայ, որ Ատրպէյճան-Ռուսիա յարաբերութիւնները վատթարանան:
Երեսփոխան Մուպարիզ Կուրպանլը նաեւ յայտնեց, թէ Ռուսիոյ այս որոշումը բացասական ազդեցութիւն պիտի չունենայ ղարաբաղեան հակամարտութեան կարգաւորման աշխատանքներուն վրայ՝ աւելցնելով, թէ երկու երկիրներուն միջեւ լաւ յարաբերութիւններ հաստատուած են տարբեր ոլորտներու մէջ:
Կապալայի կայանը աշխատելու սկսած էր 1985ին եւ կը հանդիսանար Խորհրդային Միութեան հակահրթիռային վահանի ութ կայաններէն մէկը:
Դիւանագիտական շրջանակներ կը նշեն, որ Ռուսիա պիտի սկսի ամբողջ հզօրութեամբ բանեցնելու Հայաստանի Արմաւիր քաղաքի մերձակայքի իր ռատարը, ինչպէս նաեւ հարաւային Ռուսիոյ մէջ գտնուող այլ ռատարներ՝ հետեւելու համար Թուրքիոյ, Իրաքի, Իրանի, Հնդկաստանի ու Միջին Արեւելքի պետութիւններու տարածքին վրայ պատահած իրադարձութեանց։

 

LEAVE A REPLY

Please enter your comment!
Please enter your name here