Ատրպէյճանի Մօտ Իրանի Դեսպանը Արձագանգած է Ատրպէյճանական անօդաչուներու Գործողութիւններուն

0
56

  Իրանի օդային սահմանը խախտող անօդաչու օդանաւերը դիւրութեամբ պիտի վնասազերծուին: Այդ մասին՝ ըստ panorama.am-ի՝  «Ինթըրֆաքս»-ին տուած հարցազրոյցին մէջ յայտարարած է Ատրպէճանի մօտ Իրանի Իսլամական Հանրապետութեան դեսպան Մոհսեն Փաք Այինը:

Լրագրողին այն հարցումին, թէ Իրան ինչպէս կը վերաբերի Ատրպէյճանի պատկանող անօդաչու օդանաւերուն կողմէ Իրանի օդային սահմանը խախտելու մասին տեղեկատուութեան, դեսպան Փաք Ային, նշած է. «Իրանի զինուած ուժերը կատարելապէս կը վերահսկեն երկրի օդային սահմանները եւ անոնք խախտողներուն հեշտութեամբ կրնան վնասազերծել, ինչպէս ատիկա կատարեցինք ամերիկեան անօդաչու օդանաւերու պարագային»:

Յիշեցնենք, որ Դեկտեմբեր 10-ին իրանական «press TV.ir» կայքը հաղորդած էր, որ Ատրպէճանի թալիշաբնակ Ասթարա շրջանին մէջ ամերիկեան ռատիօտեղակայանքի համակարգերու գործարկումէն ետք, Ատրէյպճան  սկսած է իսրայէլացի ռազմական խորհրդատուներու աջակցութեամբ կազմուած անօդաչու օդանաւերու միջոցով հեռախուզական գործողութիւններ իրականացնել  Իրանի սահմանին:

Իրանի Մէճլիսի պաշտօնական կայքին հաղորդով` Մէճլիսի պաշտպանութեան հարցերով խորհուրդի  նախագահ Էսմայիլ Քոուսարին, արձագանգելով ատրպէյճանական անօդաչու օդանաւերու կողմէ Իրանի սահմանին հետախուզական գործողութիւն իրականացնելու մասին տեղեկատուութեան, մասնաւորապէս նշած է. «Իրանի զինուած ուժերուն կողմէ Պաքուի անօրինական քայլերու նկատմամբ շուտով անհրաժեշտ միջոցներ պիտի ձեռնարկուին եւ անոնց իւրաքանչիւր քայլին կտրուկ պատասխան պիտի տրուի: Մեր երկրի օդային սահմանը հատած իւրաքանչիւր անօդաչու կը վնասազերծենք: Եթէ Ատրպէյճան շարունակէ իր գործողութիւնները, ապա ատրպէյճանական անօդաչու օդանաւերու գլխուն նոյն փորձանքը կը բերենք, ինչպէս ամերիկեանի պարագային»:

Իրանի ԱԳՆ մամլոյ խօսնակ Ռամին Մեհմանփարաստը, անդրադառնալով ատրպէյճանական անօդաչու օդանաւերու կողմէ Իրանի սահմանը խախտելու մասին լրագրողին տուած հարցին, յայտարարած է. «Մեր օդային սահմանը խախտելու համար նախ պէտք է կարենան ապակողմնորոշել մեր պաշտպանական համակարգերը. Հաշուի առնելով մեր երկրի սահմաններու պաշտպանութեան համար Իրանի զինուած ուժերու կարողութիւնները` մեր երկրի օդային սահմանը խախտողը կտրուկ հակահարուածի պիտի արժանանայ»:

 

LEAVE A REPLY

Please enter your comment!
Please enter your name here