«Արմիս» Երգչախումբի Ս. Ծնունդի Տօնին Նուիրուած Համերգը Լիբանանի Մէջ

0
137

«Պէյրութը կ՛երգէ» հոգեւոր երաժշտութեան 5-րդ փառատօնի համերգներու շրջագիծին մէջ, հայ կաթողիկէ Ս. Գրիգոր Լուսաւորիչ – Ս. Եղիա աթոռանիստ եկեղեցւոյ մէջ, Դեկտեմբեր 12-ին, երեկոյեան ժամը 8:00-ին, տեղի ունեցաւ հայ աւետարանական «Արմիս» երգչախումբի Ս. Ծնունդի համերգը: Այս մասին կը հաղորդէ Լիբանանի «Ազդակ» օրաթերթը:

Համերգին բացման խօսքը արտասանեց «Արմիս» մշակութային յանձնախումբի ատենապետ Հրայր Ճեպեճեան, որ մաղթեց, որ 2013 տարին ըլլայ խաղաղութեամբ եւ յաջողութեամբ լի տարի մը: Ան շնորհակալութիւն յայտնեց բոլոր անոնց, որոնք իրենց մասնակցութիւնը բերին այս նախաձեռնութեան յաջողութեան:

Ապա ելոյթ ունեցաւ «Արմիս» երգչախումբը, որուն խմբավարն է Կարօ Աւեսեան, իսկ դաշնակահարը` Լորի Այնթապլեան: Խումբը երգեց Կոմիտասի «Քրիստոս ի մէջ»-ը, Մովսէս Խորենացիի «Ուրախացի՛ր սրբուհի»-ն, Քաչինիի «Աւէ Մարիա»-ն եւ Ս. Ծնունդի տօնին նուիրուած շարք մը ստեղծագործութիւններ: 27 անդամներէ բաղկացած «Արմիս»-ը համերգի աւարտին երգեց Ս. Ծնունդի դասական երգերու երգաշար մը, որ արժանացաւ ներկաներու ծափահարութիւններուն, որոնց իբրեւ արդիւնք երգաշարէն հատուած մը անգամ մը եւս ներկայացուեցաւ:

Յայտնենք, որ համերգին իր մասնակցութիւնը բերաւ «Արմիս» լարային քառեակը, որ նուագեց Կանաչեանի «Օրօր»-ը եւ Հենտըլի «Ալէլուիա»-ն:

«Պէյրութը կ՛երգէ» հոգեւոր երաժշտութեան 5-րդ փառատօնին ընդմէջէն «Արմիս» երգչախումբը հայ թէ օտար հասարակութեան մօտ ստեղծեց տօնական մթնոլորտ եւ մատուցեց բարձրորակ արուեստ:

LEAVE A REPLY

Please enter your comment!
Please enter your name here