Սուրիոյ Ներքին Ընդդիմութիւնը Պատրաստ Է Երկխօսութիւն Սկսելու Իշխանութիւններուն Հետ

0
146

Սուրիոյ ներքին ընդդիմութիւնը պատրաստ է երկխօսութիւն սկսելու Սուրիոյ կառավարութեան հետ, ընդ որուն` առանց նախագահ Պաշշար Ասատի հրաժարականի նախապայման դնելու: Այս մասին յայտարարած է Մոսկուա ժամանած սուրիական ընդդիմութեան պատուիրակութեան ղեկավար, «Ազգային ճակատ» շարժման ղեկավար Գատրի Ժամիլ:

Ինչպէս կը հաղորդէ «Արմենփրէս»-ը`վկայակոչելով ռուսական ԻԹԱՐ-ԹԱՍՍ գործակալութիւնը, անոր խօսքով երկխօսութիւնը միակ ուղին է ճգնաժամէն դուրս գալու համար եւ անհրաժեշտ է հասնիլ անոր: Ինչ կը վերաբերի Ասատի հրաժարականի հարցին, ապա ան նշած է, որ իրենք նման նախապայման չեն դներ:

Սուրիոյ ներքին ընդդիմութիւնը այսպէս կոչուած «Սուրիոյ բարեկամներ»-ը կը համարէ իրենց երկրի թշնամիները: Անդրադառնալով Սուրիոյ ընդդիմադիր եւ յեղափոխական ուժերու ազգային համաձայնութեան` Ժամիլ նշած է, որ խմբաւորումը կը տկարանայ եւ կը քանդուի, քանի որ նման քաղաքականութիւն չի կրնար երկար գոյատեւել: Առաջնահերթ խնդիրն է ընդդիմութեան շարքերէն հեռացնել ծայրահեղականները: Իսկ Սուրիոյ իշխանութիւններուն կողմէ քիմիական զէնք օգտագործելու հարցին պատասխանելով՝ ան ըսած է, թէ այդ մեղադրանքները նմանցուցած են իրաքեան առասպելի կրկնութեան:

«Ինչ կը վերաբերի «Փաթրիոթ» հրթիռային համակարգերու տեղակայման, ապա անոնք ճիշտ հասցէով չեն տեղակայուիր: Ամերիկացիները շատոնց կը ցանկանային Թուրքիոյ մէջ նման համակարգեր տեղադրել: Սուրիան չի կրնար սպառնալ Անգարային, քանի որ բաւական ներքին խնդիրներ ունի»,- ըսած է Ժամիլ:

Այսօր ընդդիմադիր պատուիրակութիւնը հանդիպում պիտի ունենայ Ռուսիոյ արտաքին գործոց նախարար Սերկէյ Լաւրովի հետ:

LEAVE A REPLY

Please enter your comment!
Please enter your name here