Սուրիա Կը Հերքէ «Սքոտ» Հրթիռներու Օգտագործման Մասին Լուրը

0
128

Սուրիոյ արտաքին գործոց նախարարութիւնը հերքեց ամերիկեան մամուլին մէջ տարաձայնուած եւ ապա Միացեալ Նահանգներու իշխանութեանց ու ՆԱԹՕ-ի հրամանատարութեան կողմէ հաստատուած այն լուրը, թէ Սուրիոյ բանակը սկսած է «Սքոտ» տիպի հրթիռներ օգտագործել ընդդիմութեան դէմ:
Միւս կողմէ, Սուրիոյ պետական աղբիւրները հաղորդեցին, թէ Դամասկոսի արուարձաններուն մէջ, վարժարանի մը մօտերը Հինգշաբթի օր տեղի ունեցած ահաբեկչական արարքի մը հետեւանքով սպաննուած է առնուազն 16 քաղաքացի որոնց աւելի քան կէսը կիներ եւ երեխաներ էին: Յայտնենք, թէ մէկ օր առաջ Սուրիոյ ներքին գործոց նախարարութեան շէնքին մօտերը տեղի ունեցած երկու ականուած ինքնաշարժներու պայթումին հետեւանքով սպաննուած էր հինգ հոգի:
Սուրիական բանակը Տէր Զօրի եւ Լաթաքիոյ մօտակայ գիւղերէն մէկուն մէջ տեղի ունեցած գործողութեան ընթացքին աւելի քան 100 ահաբեկիչներ սպաննած է՝ ներառեալ աֆղան վարձկաններ, ու գրաւած է մեծ քանակութեամբ պայթուցիկ նիւթեր:
Նաեւ, ռուսական թերթի մը հետ հարցազրոյցի մը ընթացքին, Ռուսիոյ արտաքին գործոց փոխնախարար Միխայէլ Պոկտանով յայտարարեց, թէ Սուրիոյ մէջ իրադարձութիւնները ցոյց կու տան, թէ ընդդիմութիւնը որոշ շրջաններու մէջ նեղ կացութեան մատնած է իշխանութեան հաւատարիմ ուժերը: «Դժբախտաբար, չենք կրնար հաստատօրէն ըսել, թէ ընդդիմութեան յաղթանակը անկարելի է», աւելցուց ան, մինչ ՆԱԹՕ-ի բարձրաստիճան պաշտօնատար մը կը պնդէր, թէ սուրիական վարչակարգը տապալման սեմին կը մօտենայ:
Մինչ այդ, Ռուսիոյ բանակի սպայակոյտի պետ Վալերի Կերասիմով յայտարարեց, թէ Ռուսիա կ՛ընդդիմանայ «Սուրիոյ մէջ երրորդ կողմի մը ռազմական միջատութեան»:
Նաեւ, Գերմանիոյ պետական նախարար Միքայէլ Լինք յայտարարեց, թէ «Փեթրիոթ» հրթիռներու համակարգերը Թուրքիոյ մէջ պիտի տեղակայուին Սուրիոյ սահմանէն հարիւր քիլօմեթր հեռաւորութեան վրայ, իսկ ռազմական բարձրաստիճան աղբիւրներ «Հայեաթ» օրաթերթին հաղորդած են, թէ թրքական գաղտնի սպասարկութիւնը յաջողցուցած է «Նուսրա ճակատ»ին Սուրիա մուտքը: Յայտնենք, թէ այս կազմակերպութիւնն է, որ այս շաբաթ ահաբեկչական որակուեցաւ Միացեալ Նահանգներու կողմէ:
Վերջապէս, Միացեալ Նահանգներու արտաքին գործոց փոխնախարար Ուիլիըմ Պըրնզ հաղորդեց, թէ սուրիական ընդդիմադիր Ազգային համաձայնական մարմինը հրաւիրուած է «կարելի եղածին չափ շուտ» Ուաշինկթըն այցելելու:

LEAVE A REPLY

Please enter your comment!
Please enter your name here