Ֆրանսան Պէտք Չէ Կանգ Առնէ Կէս Ճանապարհին. Վալերի Պուայէ

0
115

Ֆրանսացի պատգամաւոր, Հայոց Ցեղասպանութեան հերքումը քրէականացնող օրինագծի հեղինակ Վալերի Պուայէ Ֆրանսայի Ազգային ժողով ներկայացուցած է երեք գրութիւն` 2001-ին Ֆրանսայի կողմէ Հայոց Ցեղասպանութեան ճանաչման մասին օրէնքը պաշտպանելու նպատակով: Այս մասին կը տեղեկացնէ «Nouvelles d’Armenie»-ին:

 Դեկտեմբեր 13-ին անոր տարածած յայտարարութեան մէջ, պատգամաւորը մասնաւորապէս նշած է.

 «Օրէնքով ճանչցուած ցեղասպանութիւններու հերքումը քրէականացնող օրինագծի ընդունումէն եւ Սահմանադրական խորհուրդի գրաքննութենէն ետք ես չհրաժարեցայ պայքարէն:

Այդ իսկ պատճառով Ազգային ժողով ներկայացուցած եմ երեք գրութիւն` 2001-ին Ֆրանսայի կողմէ 1915-ի Հայոց Ցեղասպանութեան պաշտօնական ճանաչման մասին օրէնքը պաշտպանելու նպատակով: Այսպէս.

 – 18 Հոկտեմբեր 2011-ին ներկայացուած օրինագիծը իր նախնական տեսքով, որ 45.000 եուրոյի տուգանք եւ մէկ տարուան ազատազրկում, կամ այդ երկու պատիժներէն մէկը կը նախատեսէ բոլոր անոնց համար, որոնք հրապարակաւ կը խրախուսեն, կը վիճարկեն կամ կը փորձեն արդարացնել ցեղասպանութիւնները, մարդկութեան դէմ յանցագործութիւնները եւ ռազմական յանցագործութիւնները:

 – Օրէնքով ճանչցուած ցեղասպանութիւններու հերքումը քրէականացնող օրինագիծը այն տեսքով, որմով 23 Յունուար 2012-ին ընդունուած էր եւ 28 Փետրուար 2012-ին ենթարկուած Սահմանադրական խորհուրդի գրաքննութեան:

 – Եւ, վերջապէս, ներկայացուցած եմ Մարսէյլի փաստաբաններու աշխատակազմի անդամ պարոն Ֆիլիփ Գրիգորեանի օգնութեամբ, Սահմանադրական խորհուրդի վերոյիշեալ որոշման վրայ լոյս սփռելու նպատակով, Սահմանադրական խորհուրդի հրապարակային դիրքորոշման պատճառները հետաքննող ժամանակաւոր յանձնաժողով ստեղծելու բանաձեւ:

 

Այդ բոլոր գրութիւնները, իմ կարծիքով, յոյս կու տան այդ գործի յաջող ելքին, որուն նպատակը, կ’ուզեմ յիշեցնել անգամ մը եւս, պէտք է արձագանգ գտնէ իւրաքանչիւր ֆրանսացիի սրտին մէջ` իբրեւ մարդու իրաւունքներու պաշտպանութեան կոչ: Այդ պատճառով ալ ես հանդիսաւոր կերպով կը խնդրեմ Ազգային ժողովի նախագահ Քլոտ Պարդոլոնին` կարճ ժամանակի ընթացքին Ազգային ժողովի օրակարգին մէջ ընդգրկել այդ երեք գրութիւնները, որոնք դուրս են իւրաքանչիւր տեսակի քաղաքական տարաձայնութիւններու, կուսակցական պատկանելութեան եւ մեծամասնութեան կամ ընդդիմութեան իւրաքանչիւր դիրքորոշման սահմաններէն»:

 Յայտարարութեան աւարտին Վալերի Պուայէ նշած է, որ 2001-ին օրէնքը որոշիչ էր մարդու իրաւունքներու պաշտպանութեան ճանապարհին: «Այս օրինագծերը ուղղուած են քրէական օրէնքներու եւ 2001-ի օրէնքի պաշտպանութեան համաձայնեցման: Ֆրանսան պէտք չէ կանգ առնէ կէս ճանապարհին»,– ընդգծած է ֆրանսացի պատգամաւորը:

LEAVE A REPLY

Please enter your comment!
Please enter your name here