Հայաստանի Պետական Ազգային Ակադեմիական Երգչախումբը 75 Տարեկան է

0
147

Դեկտեմբեր 17-ին “Արամ Խաչատրեան” համերգասրահին մէջ տեղի պիտի ունենայ Հայաստանի պետական ազգային ակադեմիական երգչախումբի հիմնադրման 75-ամեակին նուիրուած յոբելինական համերգ: Այս մասին կը յայտնեն ՀՀ մշակոյթի նախարարութենէն:

Համերգային ծրագրով պիտի հնչեն` Կարա-Մուրզա “Լեպհօ լէ-լէ”, Կոմիտաս “Կուժն առա, գնա-գնա”, “Ել-ել”, Ա. Տիգրանեան “Անուշ” օփերայի նախերգանքը, Ռօսսինի “Վիլհելմ Թել” օփերայէն հատուած, Տէյվիս “The Wonders of this Hands”, Պուրլեկ “Deep river”, Բոլեդդի “Les champs elyse`es”, Չուխաճեան “Լեպլէպիճի” օփերայէն հատուածներ, Պեթհովեն “Ֆանթազիա” դաշնամուրի, երգչախումբի եւ նուագախումբի համար, Հախինեան “Սայաթ-Նովա” գանդադ:
Համերգին պիտի մասնակցին Հայաստանի պետական ակադեմիական երգչախումբը (գեղարուեստական ղեկավար եւ գլխաւոր խմբավար Յ. Չէքիճեան), մենակատարներն են` Արծուիկ Տեմուրչեան (սոփրանօ), Լիլիթ Զաքարեան (դաշնամուր), Սոֆիա Պաղտասարեան (սոփրանօ), Սարգիս Աղամալեան (թենոր), Պօղոս Պիազբեկեան (պաս), Արամ Թուրապեան (քոնցերթմեյսթըր):

Հայաստանի պետական երգչախումբը ստեղծուած է 1937-ին. 1961-էն ի վեր երգչախումբի գեղարուեստական ղեկավարն է Յովհաննէս Չէքիճեան: Հայաստանի պետական երգչախումբը ստեղծման օրէն բարձր կատարողական վարպետութեամբ ներկայացրուցած է իր երգացանկը` Կոմիտաս, Եկմալեան, Կարա-Մուրզա, Տիգրանեան, Արամ Խաչատրեան, Առնօ Բաբաջանեան, Ալեքսանդր Յարութիւնեան եւ բազմաթիւ այլ հեղինակներու ստեղծագործութիւններ: Երգչախումբը աշխոյժ գործունէութիւն ծաւալած է Հայաստանի բոլոր շրջաններուն մէջ, իսկ հայրենիքէն դուրս` 180 քաղաքի մէջ հանդէս եկած է շուրջ 820 համերգով: Նիւ Եորքի, Լոնտոնի, Փարիզի, Փրակի, Պէյրութի եւ այլ քաղաքներու մէջ երգչախումբը 27 լեզուներով երգած է հայ եւ միջազգային դասական երգահաններու ստեղծագործութիւններ:
1969-էն ի վեր երգչախումբը ունի ակադեմիական կոչում, իսկ 1975-էն հանրապետութեան վաստակաւոր խումբն է:

Երգչախումբի գործունէութիւնը ծաւալած է մեծ կտաւի ստեղծագործութիւններով` 65 սիմֆոնիք նուագախումբերու մասնակցութեամբ, որոնց մէջ են Մոսկուայի Մեծ թատրոնի նուագախումբը, Սովետական Միութեան սիմֆոնիք մեծ նուագախումբը, Մոսկուայի ֆիլհարմոնիայի ակադեմիական նուագախումբը, Ս. Փեթերզպուրկի վաստակաւոր խումբ ակադեմիական նուագախումբը, Նովոսիպիրսքի ակադեմիական սիմֆոնիք նուագախումբը, Ուքրանիոյ պետական սիմֆոնիք նուագախումբը, Պելառուսի, Լաթվիայի, Լիթվայի, Էսթոնիոյ պետական նուագախումբերը, նաեւ Պուտափեշտի, Վրոցլաւի, Մարսելի, Քաննի եւ ուրիշ այլ քաղաքներու սիմֆոնիք նուագախումբերը` Հ. Չէքիճեանի գլխաւորութեամբ:

Երգչախումբը ունի Եկմալեանի եւ Կոմիտասի պատարագներու խտասալիկներ, որոնք սիրուած են ամբողջ աշխարհի մէջ: Հայաստանի պետական երգչախումբի եւ Ռուսաստանի սիմֆոնիք նուագախումբերու համատեղ գործունէութեան ձայնագրութիւններէն մէկը Փարիզի մէջ արժանացած է “Մեծ Մրցանակ”-ի:
1980-ին Մոսկուայի երաժշտանոցի մեծ դահլիճին մէջ ողիմպիական խաղերու մշակութային ձեռնարկներու ծիրէն ներս` միութեան բոլոր անուանի խումբերու մրցակցութեան իբրեւ արդիւնք` Հայաստանի պետական երգչախումբի կատարմամբ հնչած Պեթհովենի 9-րդ սիմֆոնիան ճանչցուած է լաւագոյնը, որուն իբրեւ արդիւնք խմբավար Յովհաննէս Չէքիճեան արժանացած է “Ժողովուրդներու բարեկամութիւն” շքանշանին:

2012 Փետրուարին Հայաստանի պետական ակադեմիական երգչախումբին շնորհուած է  “Ազգային” կարգավիճակ:

 

 

LEAVE A REPLY

Please enter your comment!
Please enter your name here