«Հայաստան» Համահայկական Հիմնադրամի Լիբանանի Գործադիր Մարմինը 100.000 Ամերիկեան Տոլար Կը Յատկացնէ Սուրիահայութեան

0
126

«Հայաստան» համահայկական հիմնադրամի Լիբանանի գործադիր մարմինը կը յայտնէ, որ Դեկտեմբեր 2012-ին իր կազմակերպած դրամահաւաք ռատիոթոնին ստացաւ 108.000 ամերիկեան տոլարի նուիրատւութիւններ եւ նուիրատւութիւններու խոստումներ, որոնք պիտի յատկացուին նախապէս ճշդուած երեք նպատակներու` սուրիահայութեան, լիբանանահայ կրթական հաստատութիւններու եւ Արցախի սահմանամերձ գիւղերուն մէջ համայնքային կեդրոններու կառուցման ծրագիրին:

Մարմինը նաեւ տեղեկացուցած էր, որ այս գումարին պիտի աւելցնէ նախորդ տարիներու դրամահաւաքներէ իր մօտ ունեցած պահեստի` խնայողական դրամահաշիւէն գումար մը, որպէսզի կարելի ըլլայ կատարել իր որոշած բոլոր յատկացումները:

Առ այդ, «Հայաստան» համահայկական հիմնադրամի Լիբանանի գործադիր մարմինը իր վերջին նիստին որոշեց լիբանանահայութեան կողմէ 100.000 ամերիկեան տոլար յատկացնել սուրիահայութեան, 50.000 ամերիկեան տոլար` Արցախի սահմանամերձ գիւղերու համայնքային կեդրոններու կառուցման ծրագիրին, իսկ 28.000 ամերիկեան տոլար` լիբանանահայ կրթական հաստատութիւններուն:

Մարմինը անգամ մը եւս շնորհակալութիւն կը յայտնէ լիբանանահայութեան` իր վստահութեան համար, եւ կ՛ապաւինի բոլոր նուիրատուներու գիտակցութեան` իրենց խոստումները ամէնէն կարճ ժամանակամիջոցին յարգելով կատարելու վճարումները, որպէսզի նուիրատուութիւնները ճիշդ ժամանակին ծառայեն իրենց վսեմ նպատակին:

 

LEAVE A REPLY

Please enter your comment!
Please enter your name here